തലയോലപ്പറമ്പ് : ചെമ്പ് , മറവൻതുരുത്ത് പഞ്ചായത്തുകളെ ബന്ധിപ്പിച്ച് മുവാറ്റുപുഴ ആറിനുകുറുകെ പാലം നിർമ്മിക്കണമെന്ന ആവശ്യം ശക്തമാകുന്നു. ഉൾപ്രദേശമായ ഏനാദിയിലുള്ള നൂറുകണക്കിന് കുടുംബങ്ങൾ പുറം ലോകവുമായി ബന്ധപ്പെടുന്നതിന് നിലവിൽ കടത്തിനെയാണ് ആശ്രയിക്കുന്നത്. കടത്തു കടക്കാതെ വൈക്കത്തുനിന്ന് ഏനാദിയിലേയ്‌ക്കെത്താൻ നീർപ്പാറവഴിയോ തട്ടാവേലി പാലം കടന്ന് കരിപ്പാടംവഴിയോ കിലോമീറ്ററുകൾ ചുറ്റി സഞ്ചരിക്കണം. മറവൻതുരുത്തിലെ മൂലേക്കടവിനേയും ഏനാദിയേയും ബന്ധിപ്പിപ്പിച്ച് മൂവാറ്റുപുഴ ആറിനു കുറുകെ പാലം നിർമ്മിക്കണമെന്നത് ഏനാദിക്കാരുടെ ചിരകാല സ്വപ്നമാണ്. വാഹനങ്ങൾ മറുകര എത്തിക്കാനായി ഉണ്ടായിരുന്ന ചങ്ങാട സർവീസ് നിലച്ചതോടെയാണ് ജനം ഏറെ ദുരിതത്തിലായത്. ഇരുഭാഗത്തും റോഡ് സൗകര്യമുള്ള ഇവിടെ പാലം നിർമ്മിക്കുന്നതുമായി ബന്ധപ്പെട്ട് നിരവധി തവണ മണ്ണുപരിശോധനയടക്കം നടത്തിയെങ്കിലും തുടർ നടപടികളുണ്ടായില്ല. പല തവണ ബഡ്ജറ്റിൽ പരാമർശം വന്നപ്പോഴൊക്കെ ഏറെ പ്രതീക്ഷ അർപ്പിച്ചെങ്കിലും നിരാശയായിരുന്നു ഫലം.