കൊച്ചി: സംസ്ഥാനത്ത് സ്വർണവിലയുടെ റെക്കാഡ് മുന്നേറ്രം തുടരുന്നു. പവന് 80 രൂപ വർദ്ധിച്ച് വില ഇന്നലെ കേരളത്തിന്റെ ചരിത്രത്തിലെ ഏറ്റവും ഉയർന്ന നിരക്കായ 24,​880 രൂപയിലെത്തി. പത്തു രൂപ വർദ്ധിച്ച് 3,​110 രൂപയാണ് ഗ്രാം വില. 2019ൽ ഇതുവരെ കേരളത്തിൽ പവൻവില കുറിച്ച മുന്നേറ്റം 3,​010 രൂപയാണ്. ഗ്രാമിന് 180 രൂപയും ഉയർന്നു.

അന്താരാഷ്‌ട്ര വിലയിലെ കുതിപ്പ്,​ ഡോളറിനെതിരെ രൂപയുടെ മൂല്യത്തകർച്ച മൂലം ഇറക്കുമതിച്ചെലവിൽ ഉണ്ടായ വർദ്ധന,​ വിവാഹ സീസണിന്റെ പശ്‌ചാത്തലത്തിലുള്ള മികച്ച വില്‌പന എന്നിവയാണ് സ്വർണവിലയുടെ കുതിപ്പിന് പ്രധാനകാരണം. ഔൺസിന് 1,​326.30 ഡോളർ വരെ ഉയർന്ന അന്താരാഷ്‌ട്ര സ്വർണവില ഇന്നലെ 1,​316.80 ഡോളർ വരെ താഴ്‌ന്നിട്ടുണ്ട്. എന്നാൽ,​ ഡോളറിനെതിരെ രൂപയുടെ മൂല്യം 56 പൈസ ഇടിഞ്ഞ് 71.80ൽ എത്തിയതോടെ ആഭ്യന്തര സ്വർണവില ഉയരുകയായിരുന്നു. രൂപയുടെ തകർച്ച തുടർന്നാൽ,​ വരും നാളുകളിലും സ്വർണവില ഉയരും.