തിരുവനന്തപുരം: കുറച്ചുദിവസങ്ങളായി എ.ടി.എം.കൗണ്ടറുകളിൽ കാർഡുകളിൽ പിടിവലിയാണ്. കാരണം മറ്റൊന്നുമല്ല, കാർഡുകൾ സുരക്ഷാ ചിപ്പുവച്ച കാർഡുകളാക്കിയതോടെ രണ്ടുതരം എ.ടി.എം ഉണ്ട്. ഉപയോഗിക്കുമ്പോൾ കാർഡുകൾ പിടിച്ചുവയ്‌ക്കുന്ന എ.ടി.എമ്മും പിടിച്ചുവയ്‌ക്കാത്തവയും. ചിപ്പ് സംവിധാനം റീഡ് ചെയ്യുന്ന എ.ടി.എമ്മുകളിൽ കാർഡ് ഇട്ടുകഴിഞ്ഞാൽ ഉപയോഗം പൂർത്തിയാക്കുന്നതുവരെ കാർഡിനെ മെഷീൻ പിടിച്ചുവയ്‌ക്കും. ഇതുവരെ ചെയ്‌തതുപോലെ സ്വെെപ് ചെയ്‌ത് പുറത്തെടുക്കനാവില്ല.
എ.ടി.എമ്മുകളിൽ ഈ വിവരം പ്രദർശിപ്പിച്ചിട്ടില്ല. അതുകൊണ്ടുതന്നെ എ.ടി.എം കാർഡ് കുടുങ്ങിയെന്നു കരുതി പലരും പണം എടുക്കാനുള്ള ശ്രമം ഉപേക്ഷിക്കുന്നു. എക്‌സിറ്റ് അടിച്ച് കാർഡ് പുറത്തെടുക്കുന്നു. പഴയ എ.ടി.എമ്മുകളും സ്വെെപ് ചെയ്‌തശേഷം കാർഡ് എടുക്കാം. കാർഡ് ഇട്ട ശേഷം പുറത്ത് വരുന്നില്ലെങ്കിൽ പരിഭ്രമിക്കേണ്ടതില്ല. ഉപയോഗം കഴിയുന്നതോടെ കാർഡ് പുറത്തുവന്നുകൊള്ളും. സുരക്ഷാ ചിപ്പ് റീഡ് ചെയ്യാൻ വേണ്ടിയാണ് കാർഡ് പിടിച്ചുവച്ചിരിക്കുന്നത്.