കൊച്ചി: റെക്കാഡ് കുതിപ്പിന് വിരാമമിട്ട് സംസ്ഥാനത്ത് സ്വർണവില താഴേക്ക് നീങ്ങുന്നു. ആഭരണ പ്രേമികൾക്ക് ആശ്വാസമായി പവൻവില ഇന്നലെ 160 രൂപ കുറഞ്ഞ് 24,​640 രൂപയിലെത്തി. 20 രൂപ താഴ്‌ന്ന് ഗ്രാം വില 3,​080 രൂപയായി. കഴിഞ്ഞ നാലിന് പവന് ചരിത്രത്തിലെ ഏറ്റവും കൂടിയ വിലയായ 24,​880 രൂപയിലും ഗ്രാം വില 3,​110 രൂപയിലും എത്തിയിരുന്നു.

രാജ്യാന്തര വിപണിയിലെ വിലക്കുതിപ്പ്,​ ഡോളറിനെതിരെ രൂപയുടെ മൂല്യത്തകർച്ച മൂലം ഇറക്കുമതി ചെലവിലുണ്ടായ വർദ്ധന,​ വിവാഹ സീസണിലെ മികച്ച വില്‌പന എന്നിവയാണ് പൊന്നിന്റെ വിലക്കയറ്റത്തിന് കാരണമായത്. ഇന്നലെ രാജ്യാന്തര വില ഔൺസിന് 1,​310 ഡോളറിൽ നിന്ന് 1,​302 ഡോളറിലേക്ക് താഴ്‌ന്നത്,​ ഇന്ത്യയിലും വില കുറയാൻ സഹായകമായി. ന്യൂഡൽഹി സ്വർണ വിപണിയിൽ ഇന്നലെ പത്തുഗ്രാമിന് 270 രൂപ താഴ്‌ന്ന് വില 34,​180 രൂപയിൽ എത്തിയിട്ടുണ്ട്.