പോൺ വീഡിയോയിൽ അഭിനയിക്കുന്ന സ്ത്രീകളെ ഇരുളിന്റെ മറവിൽ ആസ്വദിക്കുകയും വെളിച്ചം പരക്കുമ്പോൾ അഭിസാരികയെന്ന ലേബൽ നൽകി പിച്ഛിക്കുകയും ചെയ്യുന്നതാണ് മലയാളിയുടെ സദാചാര മനസ് എന്ന വിമർശനം ഉന്നയിക്കുകയാണ് ഫേസ്ബുക്കിലൂടെ സന്ദീപ് ദാസ്. അടുത്തിടെ ബോളിവുഡ് നടിയായ സണ്ണി ലിയോൺ രണ്ട് ആൺകുട്ടികളെ വാടകഗർഭത്തിലൂടെ സ്വന്തമാക്കിയിരുന്നു, ഈ കുട്ടികളുടെ ഒന്നാം പിറന്നാൾ ആഘോഷത്തിന് പിന്നാലെ സണ്ണിലിയോണിനെ കുറ്റപ്പെടുത്തി സോഷ്യൽ മീഡിയയിലടക്കം പ്രതികരണങ്ങൾ വന്നിരുന്നു. കേരളം പ്രളയത്തിൽ വീണ ഘട്ടത്തിലും തന്നാലാവുന്ന സഹായം ചെയ്ത നടിയാണ് സണ്ണി ലിയോണെന്നും എന്നാൽ ഇതൊന്നും ഓർക്കാതെ കേരളത്തിലെ ചില സദാചാരസംരക്ഷകരുടെ നിയന്ത്രണം നഷ്ടപ്പെട്ട അവസ്ഥയാണെന്നും അദ്ദേഹം കുറിക്കുന്നു.
സണ്ണിലിയോണിനെ പോലെ രണ്ടാം നിര ചിത്രങ്ങളിൽ ശരീരം പ്രദർശിപ്പിച്ച് അഭിനയിച്ച സിൽക്ക് സ്മിതയും,ഷക്കീലയും കൂടുതൽ കേട്ടിട്ടുള്ളത് ശാപ വാക്കുകൾ മാത്രമാണ്. എന്നാൽ ഇവർക്കൊപ്പം ഇഴുകി ചേർന്ന് അഭിനയിച്ച പുരുഷൻമാരുടെ പേരുകൾ സദാചാരക്കാർ വിട്ടുപോവുകയും ചെയ്യുന്നു. മോഹൻലാലിന്റെ സ്ഫടികത്തിലും മമ്മൂട്ടിയുടെ അഥർവ്വത്തിലും അഭിനയിച്ച സിൽക്ക് സ്മിതയുടെ പേര് ആ ചിത്രങ്ങളുടെ പേര് പ്രതിപാദിക്കുന്നി ലേഖനങ്ങളിൽ നിന്നും ഒഴിവാക്കിയിരിക്കുന്നത് കാണാനാവും.
ബി ഗ്രേഡ് സിനിമകളിൽ സ്ത്രീകൾ അഭിനയിക്കുന്നത് ലൈംഗിക ആസക്തി മൂലമാണെന്നാണ് പലരുടെയും ധാരണ.എന്നാൽ സ്മിത ആ ജോലി ഇഷ്ടത്തോടെ തെരഞ്ഞെടുത്തതായിരുന്നില്ല.ഒരിക്കലും ഒരു പോൺ സ്റ്റാർ ആകരുതെന്ന് കണ്ടുമുട്ടുന്ന പെൺകുട്ടികളോടെല്ലാം അവർ പറയുമായിരുന്നു.സ്മിത രാത്രിയിൽ പോലും കൂളിംഗ് ഗ്ലാസ് ധരിക്കുമായിരുന്നു .ഒരുപക്ഷേ അവർ മറച്ചുപിടിക്കാൻ ശ്രമിച്ചത് സ്വന്തം കണ്ണുനീരാകാമെന്നും സന്ദീപ് ഫേസ്ബുക്ക് പോസ്റ്റിൽ കുറിക്കുന്നു. പാവങ്ങളെ സഹായിക്കാൻ പണം ചെലവഴിച്ച സിൽക്ക് സ്മിതയെ മറ്റൊരു കണ്ണിലൂടെ കാണാനാണ് മലയാളികൾ ഇഷ്ടപ്പെടുന്നത്.
യുവാക്കളെ ഒരുകാലത്ത് ത്രസിപ്പിച്ച ഷക്കീലയുടെ കഥയും ഇതിൽ നിന്നും വ്യത്യസ്തമല്ല.കുടുംബത്തിന്റെ നിലനില്പിന് വേണ്ടിയാണ് അവർ 'കിന്നാരത്തുമ്പികൾ' പോലുള്ള ചിത്രങ്ങളിൽ അഭിനയിച്ചത്.ജീവകാരുണ്യപ്രവർത്തനങ്ങളിൽ ഷക്കീലയും മോശമായിരുന്നില്ല.സമൂഹം ഇന്നും പുച്ഛത്തോടെ കാണുന്ന ട്രാൻസ്‌ജെന്റർ കമ്മ്യൂണിറ്റിയിൽ നിന്ന് ഒരാളെ ദത്തെടുക്കുകയും ചെയ്തു.ഇത്രയൊക്കെ ചെയ്തിട്ടും ഷക്കീല എന്ന പേര് പറയാൻ പോലും നമുക്ക് ഇപ്പോഴും മടിയാണ്.
പോൺ വീഡിയോ കാണാൻ ഇവിടെ ആളുകളുള്ളതിനാലാണ് പുരുഷൻമാർക്കും സ്ത്രീകൾക്കും ക്യാമറയ്ക്കുമുമ്പിൽ നഗ്നരാകേണ്ടി വരുന്നത്. നിവൃത്തികേടുകൊണ്ട് ഒരു സ്ത്രീ സ്വന്തം ശരീരം വിൽപ്പനയ്ക്കുവെച്ചാൽ അവളെ നാം 'പിഴച്ചവൾ' എന്ന് വിശേഷിപ്പിക്കും.പെണ്ണുടൽ തേടിവന്ന പുരുഷൻമാരെക്കുറിച്ച് ആരും അന്വേഷിക്കാറില്ല. ഇനിയെങ്കിലും ഈ സ്ത്രീകളെ സമാധാനത്തോടെ ജീവിക്കാൻ അനുവദിക്കണമെന്നും ഫേസ്ബുക്ക് പോസ്റ്റിൽ കുറിക്കുന്നു.