കൊച്ചി: കേരള ബ്ലാസ്റ്റേഴ്സ് ആരാധകക്കൂട്ടായ്മയായ മഞ്ഞപ്പടയ്ക്കെതിരെ പരാതിയുമായി മുൻ ബ്ലാസേറ്റ്ഴ്സ് താരവും ഇപ്പോൾ ചെന്നൈയിൻ ടീമംഗവുമായ സി.കെ. വിനീത്. മഞ്ഞപ്പട തനിക്കെതിരെ വ്യാജ പ്രചാരണം നടത്തുന്നതായി വിനീത് ആരോപിച്ചു. ബോൾ ബോയിയെ അസഭ്യം പറഞ്ഞുവെന്ന് ആരാധകർ വ്യാജപ്രചാരണം നടത്തുന്നതായി താരം പറഞ്ഞു. സംഭവത്തിൽ മഞ്ഞപ്പട അംഗങ്ങൾക്കെതിരെ വിനീത് പൊലീസിൽ പരാതി നൽകി.
കൊച്ചിയിൽ കഴിഞ്ഞദിവസം നടന്ന ചെന്നൈ- ബ്ളാസ്റ്റേഴ്സ് മത്സരത്തിനിടയിൽ സി.കെ. വിനീത് ഏഴ് വയസുകാരനായ ബോൾ ബോയിയോട് തട്ടിക്കയറിയെന്നും അസഭ്യം പറഞ്ഞെന്നുമാണ് സോഷ്യൽ മീഡിയയിലൂടെ പ്രചരിക്കുന്നത്. സി.കെ.വിനീതിനെതിരെ മാച്ച് കമ്മീഷണർ നടപടി ആവശ്യപ്പെട്ടെന്നും പ്രചരണത്തിലുണ്ട്. കേരള ബ്ളാസ്റ്റേഴ്സ് ആരാധക കൂട്ടായ്മയായ മഞ്ഞപ്പടയിലെ ചില അംഗങ്ങളുടെ ശബ്ദ സന്ദേശവും ഇത്തരത്തിൽ പ്രചരിക്കുന്നുണ്ട്. ഇതിനെതിരെയാണ് സി.കെ.വിനീത് എറണാകുളം കമ്മീഷണർക്ക് പരാതി നൽകിയത്.
മഞ്ഞപ്പടയിലെ ചില ഭാരവാഹികളാണ് ഇതിന് പിന്നിൽ. തന്റെ കരിയർ നശിപ്പിക്കാനുള്ള നീക്കമാണിത്. ബ്ലാസ്റ്റേഴ്സ് വിട്ടത് സ്വന്തം ഇഷ്ടപ്രകാരമല്ല. അവധി കഴിഞ്ഞ് വന്നപ്പോഴേക്കും തന്നെ ചെന്നൈയിൻ എഫ്‌.സിക്ക് കൈമാറുകയായിരുന്നെന്നും സി.കെ. വിനീത് വ്യക്തമാക്കുന്നു. ടീം വിട്ടവർക്കും ഇപ്പോൾ ടീമിലുള്ളവർക്കും സമാനമായ ആൾകൂട്ട ആക്രമണം നേരിടേണ്ടി വരുന്നുണ്ടെന്നും വിനീത് പറഞ്ഞു. കണക്കിൽ മാത്രമാണ് മഞ്ഞപ്പട മുന്നിലെന്നും കളിക്കാരോടുള്ള സമീപനത്തിൽ മഞ്ഞപ്പട പിന്നിലാണെന്നും അദ്ദേഹം പറഞ്ഞു.