മലയാളികൾ കേൾക്കാൻ കാത്തിരുന്ന ആ വാർത്ത എത്തി. മലയാളസിനിമയുടെ ഹാസ്യ സാമ്രാട്ട് ജഗതി ശ്രീകുമാർ വീണ്ടും അഭിനയരംഗത്തേക്കുള്ള തിരിച്ചുവരവിനൊരുങ്ങുന്നു. തൃശൂരിലുള്ള വാട്ടർ തീം പാർക്കിന്റെ പരസ്യചിത്രത്തിലൂടെയാണ് ഹാസ്യകുലപതിയുടെ തിരിച്ചു വരവ്. അപകടത്തെ തുടർന്ന് ഏഴ് വർഷത്തോളം ജഗതി മലയാള സിനിമയിൽ നിന്നു വിട്ടു നിന്നിരുന്നു.

ജഗതിയുടെ മകൻ രാജ്‌കുമാർ ആരംഭിക്കുന്ന ജഗതി ശ്രീകുമാർ എന്റർടെയിൻമെന്റ്സ് ആണ് പരസ്യചിത്രം നിർമ്മിക്കുന്നത്. അദ്ദേഹത്തെ ചികിത്സിക്കുന്ന ഡോക്ടർമാരുടെ നിർദ്ദേശപ്രകാരമാണ് ജഗതി വീണ്ടും അഭിനയരംഗത്തേക്കെത്തുന്നത്. അടുത്ത വർഷത്തോടെ സിനിമയിലും സജീവമാകും.

2012 മാർച്ചിൽ തേഞ്ഞിപ്പാലത്ത് വച്ച് നടന്ന വാഹനാപകടത്തിന്റെ രൂപത്തിൽ വന്ന ദുരന്തമാണ് ജഗതിയെ സിനിമയിൽ നിന്ന് അകറ്റിയത്. അപകടത്തിൽ ഗുരുതരമായി പരിക്കേറ്റ ജഗതി വർഷങ്ങൾ നീണ്ട ചികിത്സയിലൂടെയാണ് ജീവിതത്തിലേക്ക് മടങ്ങിവന്നത്. എന്തായാലും ഇന്ത്യയിലെ തന്നെ മികച്ച നടന്മാരിൽ ഒരാളെന്നു വിശേഷിപ്പിക്കാവുന്ന ജഗതിയുടെ തിരിച്ചു വരവിൽ ഏറെ സന്തോഷത്തിലാണ് സുഹൃത്തുക്കളും ആരാധകരും.