തിരുവനന്തപുരം: ഭക്തലക്ഷങ്ങളുടെ പ്രാർത്ഥനാ നിറവിൽ ആറ്റുകാൽ പൊങ്കാലയ്‌ക്ക് ഭക്തിനിർഭരമായ തുടക്കം. ക്ഷേത്രതന്ത്രി തെക്കേടത്ത് കുഴിക്കാട്ടില്ലത്ത് പരമേശ്വരൻ വാസുദേവൻ ഭട്ടതിരിപ്പാട് ശ്രീകോവിലിൽ നിന്നു പകർന്നു നൽകിയ ദീപം മേൽശാന്തി വിഷ്ണു നമ്പൂതിരി വലിയതിടപ്പള്ളിയിലേക്കും തുടർന്ന് സഹമേൽശാന്തി പണ്ടാരയടുപ്പിലേക്കും പകർന്നതോടെ നാരീലക്ഷങ്ങളുടെ ദിവസങ്ങളായുള്ള പ്രാർത്ഥന നിരനിരയായ അടുപ്പുകളിൽ നിറഞ്ഞുതൂകി.

ആറ്റുകാൽ ക്ഷേത്രത്തിന് 10 കി.മീ അധികം ചുറ്റളവിൽ പൊങ്കാല കലങ്ങൾ നിറഞ്ഞു കഴിഞ്ഞു. ഉച്ചയ്ക്ക് 2.15നാണ് പൊങ്കാല നിവേദ്യം. നിവേദ്യത്തിനായി 250 ഓളം ശാന്തിമാരെ വിവിധയിടങ്ങളിൽ നിയോഗിച്ചിട്ടുണ്ട്. ഒരു ലക്ഷത്തിനുമേൽ ഭക്തജനങ്ങൾ ഇത്തവണം പൊങ്കാലയ്‌ക്കെത്തിയിട്ടുണ്ടെന്നാണ് അധികൃതർ കണക്കുകൂട്ടിയിരിക്കുന്നത്. സർക്കാർ സംവിധാനങ്ങൾക്കു പുറമെ, വിവിധ ട്രസ്‌റ്റുകളുടെയും, അസോസിയേഷനുകളുടെയും നേതൃത്വത്തിൽ പൊങ്കാലയിടാൻ എത്തിയവർക്കുവേണ്ട എല്ലാ സൗകര്യങ്ങളും ഒരുക്കിയിട്ടുണ്ട്.

രാത്രി ഏഴിന് കുത്തിയോട്ട വ്രതക്കാർക്കുള്ള ചൂരൽക്കുത്ത് ആരംഭിക്കും. തുടർന്ന് വാദ്യമേളങ്ങളുടെയും താലപ്പൊലിയുടെയും കുത്തിയോട്ടക്കാരുടെയും അകമ്പടിയോടെ മണക്കാട് ശാസ്‌താ ക്ഷേത്രത്തിലേക്കു ദേവിയെ എഴുന്നള്ളിക്കും.