കൊച്ചി: സംസ്ഥാനത്ത് സ്വർണവില പവന് ചരിത്രത്തിൽ ആദ്യമായി 25,​000 രൂപ കടന്നു. പവന് ഇന്നലെ 240 രൂപ വർദ്ധിച്ച് 25,​160 രൂപയായി. ഗ്രാമിന് 30 രൂപ ഉയർന്ന് 3,​145 രൂപയിലെത്തി. ഫെബ്രുവരി 19ന് പവൻ വില കുറിച്ച 24,​920 രൂപ എന്ന റെക്കാഡാണ് പഴങ്കഥയായത്. ഗ്രാമിന് അന്നുവില 3,​115 രൂപയായിരുന്നു.

കഴിഞ്ഞ ഒരാഴ്‌ചയ്‌ക്കിടെ പവൻ വിലയിലുണ്ടായ വർദ്ധന 760 രൂപയാണ്. ഗ്രാമിന് 95 രൂപയും ഉയർന്നു. ആഗോള വിപണിവിലയിലെ മുന്നേറ്റം,​ ഡോളറിനെതിരെ രൂപയുടെ മൂല്യത്തകർച്ച,​ വിവാഹ സീസൺ പ്രമാണിച്ചുള്ള മികച്ച ഡിമാൻഡ് എന്നിവയാണ് പൊന്നിൻവിലയുടെ കുതിപ്പിന് വളമാകുന്നത്. 19ന് രാജ്യാന്തരവില ഔൺസിന് 1,​325.90 ഡോളറായിരുന്നത് ഇന്നലെ 1,​344.90 ഡോളറിലെത്തിയതോടെ ആഭ്യന്തര വിലയും കുതിക്കുകയായിരുന്നു. ഡോളറിനെതിരെ ജനുവരി ആദ്യം 69 എന്ന നിലയിലായിരുന്ന രൂപ ഇപ്പോൾ 71ന് താഴേക്ക് ഇടിഞ്ഞതും വിലക്കുതിപ്പുണ്ടാക്കുന്നു.