തിരുവനന്തപുരം: എറണാകുളം മഹാരാജാസിലെ കൊലപാതകവും കാസർഗോട്ടെ കൊലപാതകവും രണ്ടാണെന്ന ന്യായീകരണവുമായ് ചില സാംസ്‌കാരിക നായകന്മാരും നായികമാരും രംഗത്തിറങ്ങിയിട്ടുണ്ടെന്ന വിമർശനവുമായി കോൺഗ്രസ് നേതാവ് പി.സി വിഷ്ണുനാഥ് രംഗത്ത്. ശരിയാണ്, എറണാകുളത്ത് കൊലപാതകം നടത്തിയത് വർഗീയവാദികളാണ്; കാസർഗോഡ് പെരിയയിൽ കൊല നടത്തിയത് പുരോഗമനവാദികളാണ്. എന്ന് മാത്രമല്ല, കാസർഗോട്ടെ കൃപേഷും ശരത്‌ലാലും കൊല്ലപ്പെട്ടത് രണ്ടാം നവോത്ഥാന കാലത്തായതുകൊണ്ട് ഈ കൊലപാതകം നവോത്ഥാന കൊലപാതകങ്ങളുടെ പട്ടികയിലേക്കാണ് വരുന്നതെന്ന് വിഷ്ണുനാഥ് ഫേസ്ബുക്കിൽ പോസ്റ്ര് ചെയ്ത കുറിപ്പിൽ വ്യക്തമാകുന്നു.
കേരളത്തിലെ സി.പി.എമ്മിന് കൊല്ലാനൊരു സംഘമുണ്ട്, കൊന്നവനുവേണ്ടി കേസിൽ പ്രതിയാകാനൊരു സംഘമുണ്ട്, കേസ് നടത്താൻ മറ്റൊരു സംഘം ഉണ്ട്. ഇതിനെയെല്ലാം ന്യായീകരിക്കാൻ സാംസ്‌കാരിക നായകന്മാരുടെയും ന്യൂജനറേഷൻ ചലച്ചിത്ര സംവിധായകരുടെയും ഒരു സംഘം വേറെയുണ്ട്.
പുരോഗമനപക്ഷത്ത് നിലയുറപ്പിക്കുന്ന സാംസ്‌കാരിക പ്രവർത്തകർ സമൂഹത്തിലും രാഷ്ട്രീയത്തിലും തിരുത്തൽ ശക്തികളായി മാറേണ്ടവരാണ്. അധികാരത്തിന്റെ ശീതളച്ഛായയിൽ മേലാളന്മാർ എറിഞ്ഞുകൊടുക്കുന്ന അക്കാദമിയുടെയും പുരസ്‌കാരത്തിന്റെയും എല്ലിൻ കഷ്ണങ്ങൾക്കുവേണ്ടി വിനീതവിധേയരായി വാലാട്ടി നിൽക്കേണ്ടവരല്ല. എഴുത്തുകാരൻ എന്നും പ്രതിപക്ഷത്താവണം. അവൻ എന്നും മാനവികതയുടെ പക്ഷത്താവണം. ഭരണവിലാസം സംഘടനകളുടെ ചെലവ് പറ്റിയും നേതാക്കളുടെ പാദുകങ്ങൾ തുടച്ച് കൊടുത്തും അപദാനങ്ങൾ പാടിയും നടക്കുന്നവരെ സാംസ്‌കാരിക നായകരെന്നല്ല വിളിക്കേണ്ടത്. ഒപ്പം നടന്ന്, എല്ലാ കൊള്ളരുതായ്മകൾക്കും കൂടപിടിക്കുന്ന നിങ്ങൾ കാലത്തോട്, സമൂഹത്തോടെ ചെയ്യുന്നത് കൊടും പാതകമാണ്. കാരണം സി.പി.എമ്മിനെ ഇത്രയും ക്രൂരമായി പ്രവർത്തിക്കുന്ന ഒരു ക്രിമിനൽ സംഘമാക്കി മാറ്റിയതിൽ പിന്നണിപ്പാട്ടുകാരായ സാംസ്‌കാരിക പ്രവർത്തകർക്കുള്ള പങ്ക് വളരെ വലുതാണ്. നിങ്ങളും കൂടിയാണ് അവരുടെ തെറ്റുകളെ വെള്ളപൂശുന്നത്. കാസർഗോട്ടെ രണ്ട് യുവാക്കളുടെ ചോരയിൽ നിങ്ങൾക്കും പങ്കുണ്ട്- വിഷ്ണുനാഥ് പറഞ്ഞു.
പണ്ട് കൊല ചെയ്യപ്പെട്ടവരുടെ പട്ടികയും താരതമ്യപഠനവുമെല്ലാമായി പാർട്ടിക്കുവേണ്ടി നിറഞ്ഞാടുന്ന അത്തരം രൂപങ്ങളെ കാണുമ്പോൾ പുച്ഛം തോന്നുന്നു. കേരളീയ പൊതുബോധം ഈ കാപട്യം തിരിച്ചറിയുന്നു. മനുഷ്യസ്‌നേഹത്തിന്റെ ഗരിമകളെപ്പറ്റി നാലുവരി എഴുതിയാലൊന്നും നിങ്ങൾ ഉദാത്ത മനുഷ്യസ്‌നേഹിയാവില്ല. കണ്ണീരുവറ്റാത്ത അമ്മമാരുടെ നെഞ്ചുപിളർക്കുന്ന രോദനം കേൾക്കാനുള്ള സന്മനസ്സ് ഉണ്ടാവണം. അതുണ്ടാവണമെങ്കിൽ ഒരു വശത്തേക്ക് മാത്രം കേൾക്കുന്ന കാതുകൾ വിശാലമായ് തുറന്നിടണം. പക്ഷെ നിങ്ങൾക്ക് ഭയമാണ്. ഭയത്തേക്കാളുപരി വിധേയത്വമാണ്. അടിമബോധമാണ്.
ഹാ കഷ്ടം കൂട്ടരെ. ഇനിമേൽ മാനവികതയെപ്പറ്റി വളിപ്പൻ, വഴുവഴുപ്പൻ പ്രഭാഷണങ്ങളുമായ് ഈ വഴിക്ക് കണ്ടുപോകരുത് ഒറ്റയെണ്ണത്തിനെയും- വിഷ്ണുനാഥ് പറഞ്ഞു.