ദോഹ: പുൽവാമ ഭീകരാക്രമണത്തിൽ പാക്കിസ്ഥാന് മറുപടി കൊടുക്കണമെന്ന് ശശി തരൂർ എം.പി. യുദ്ധസമയത്തെ തിരഞ്ഞെടുപ്പ് കേന്ദ്രത്തിന് അനുകൂലമാണെങ്കിലും പാകിസ്ഥാന് മറുപടി നൽകണമെന്ന് ശശി തരൂർ പറഞ്ഞു. രാജ്യത്തിന്റെ അഭിമാനത്തിനേറ്റ മുറിവാണ് പുൽവാമയിലെ ഭീകരാക്രമണമെന്ന് ശശി തരൂർ ദോഹയിലെ പരിപാടിയിൽ പറഞ്ഞു.

പാക്കിസ്ഥാന് മറുപടി നൽകേണ്ടത് അനിവാര്യമാണ്. രാജ്യത്തിന്റെ വികാരത്തിനൊപ്പം കോൺഗ്രസ് ഉണ്ടെങ്കിലും ജനങ്ങളുടെ സംശയങ്ങൾ ന്യായമാണ്. ഭീകരാക്രമണത്തിന്റെ പശ്ചാത്തലത്തിൽ രാജ്യത്തെ ജനത പാക്കിസ്ഥാന് മറുപടി നൽകണമെന്ന് ആഗ്രഹിക്കുന്നു. ഇതിന് വേണ്ടി കോൺഗ്രസ് സർക്കാരിനൊപ്പം നിൽക്കും. ദോഹയിൽ കെ.എം.സി.സി സംഘടിപ്പിച്ച മലപ്പുറം പെരുമ പരിപാടിയിൽ മുഖ്യാതിഥിയായി സംസാരിക്കുകയായിരുന്നു ശശി തരൂർ.

പുൽവാമ സംഭവത്തിൽ പാർട്ടിക്കുള്ള സംശയം തന്നെയാണ് ജനങ്ങൾക്കുമുള്ളത്. മോദി സർക്കാർ ഒരുതവണ കൂടി അധികാരത്തിൽ വന്നാൽ ഇന്ത്യയിൽ ജനാതിപത്യം ഇല്ലാതാകും. മതേതര ജനാതിപത്യത്തിന്റെ പ്രതിഛായയ്ക്ക് തീരാകളങ്കം വരുത്തിക്കൊണ്ടാണ് മോദിയുടെ സർക്കാർ അധികാരം പൂർത്തിയാക്കുന്നത്. അതുകൊണ്ട് തന്നെ രാജ്യത്തെ വോട്ടർമാർ ഫാസിസത്തിനെതിരെ ഒറ്റക്കെട്ടായി മുന്നിട്ടിറങ്ങണമെന്നും ശശി തരൂർ പറഞ്ഞു.