ബാഴ്‌സലോണ: ചൈനീസ് കമ്പനിയായ ഷവോമി 5ജി സാങ്കേതികവിദ്യയോട് കൂടിയ സ്‌മാർട്‌ഫോൺ അവതരിപ്പിച്ചു. ബാഴ്‌സലോണയിൽ നടക്കുന്ന മൊബൈൽ വേൾഡ് കോൺഗ്രസിലാണ്,​ 680 ഡോളർ (ഏകദേശം 48,​000 രൂപ)​ വിലവരുന്ന ' മി മിക്‌സ് 3" ഫോൺ ഷവോമി പരിചയപ്പെടുത്തിയത്. ഫോൺ വൈകാതെ വില്‌പനയ്ക്ക് എത്തിക്കാനാകുമെന്നാണ് കമ്പനിയുടെ പ്രതീക്ഷ.

ദക്ഷിണ കൊറിയൻ കമ്പനിയായ സാംസംഗ് കഴിഞ്ഞവാരം 5ജി ഫോൺ അവതരിപ്പിച്ചിരുന്നു. ഉടൻ വിപണിയിൽ എത്തുമെന്ന് പ്രതീക്ഷിക്കുന്ന ഫോണിന് 1,​980 ഡോളർ (ഏകദേശം 1.40 ലക്ഷം രൂപ)​ മുതലാണ് വില. നിലവിൽ,​ ആഗോള സ്‌മാർട്‌ഫോൺ വിപണിയിൽ ഒന്നാംസ്ഥാനത്താണ് സാംസംഗ്. ഹുവാവേ,​ ആപ്പിൾ,​ ഷവോമി എന്നിവയാണ് യഥാക്രമം പിന്നാലെയുള്ളത്. സാംസംഗിന്റെ 5ജി ഫോണിനേക്കാൾ വില ഏറെക്കുറവാണെന്നത് നേട്ടമാകുമെന്നാണ് ഷവോമിയുടെ പ്രതീക്ഷ.