കൊച്ചി: പുതിയ നിക്ഷേപകരെ ലക്ഷ്യമിട്ടും മ്യൂച്വൽഫണ്ട് നിക്ഷേപം സംബന്ധിച്ച് ഉപഭോക്താക്കളെ ബോധവത്‌കരിക്കാനുമായി യു.ടി.ഐ മ്യൂച്വൽഫണ്ട് സംഘടിപ്പിക്കുന്ന 'ഇക്വിറ്റി യാത്ര" കേരളത്തിലെത്തി. കേരളം,​ കർണാടക,​ തമിഴ്‌നാട്,​ ആന്ധ്രപ്രദേശ്,​ ബംഗാൾ,​ ഉത്തർപ്രദേശ്,​ പഞ്ചാബ്,​ ബീഹാർ,​ ഒഡീഷ തുടങ്ങിയ സംസ്ഥാനങ്ങളിലായി 51 നഗരങ്ങളിലാണ് യാത്ര സംഘടിപ്പിക്കുന്നത്. തിരുവനന്തപുരത്തെ പര്യടനത്തിന് ശേഷം യാത്ര ഇന്നലെ കൊച്ചിയിലെത്തി.

യു.ടി.ഐയുടെ നിക്ഷേപരീതി,​ ഗവേഷണം,​ നിക്ഷേപശേഖരണം,​ വിപണി വീക്ഷണം,​ മ്യൂച്വൽ ഫണ്ടുകളുടെ ദിശ,​ സമ്പത്ത് സൃഷ്‌ടിക്കുന്നതിൽ ഓഹരികളുടെ പങ്ക് തുടങ്ങിയ വിഷയങ്ങളിൽ യു.ടി.ഐ വിദഗ്ദ്ധർ വിശദീകരണം നൽകുന്ന പരിപാടിയാണിത്. 150ലധികം ധനകാര്യ കേന്ദ്രങ്ങളും 50,​000ലേറെ സ്വതന്ത്ര ധനകാര്യ ഉപദേശകരും 302 ബിസിനസ് ഡെവലപ്‌മെന്റ് അസോസിയേറ്റുകളും ഒരു കോടിയിലേറെ നിക്ഷേപ അക്കൗണ്ടുകളും യു.ടി.ഐയ്‌ക്കുണ്ടെന്ന് യു.ടി.ഐ എ.എം.സി ഫണ്ട് മാനേജർ ലളിത് നമ്പ്യാർ പറഞ്ഞു.