ന്യൂഡൽഹി: പുൽവാമ ഭീകരാക്രമണത്തെ ബി.ജെ.പി രാഷ്ട്രീയവത്കരിക്കുകയാണെന്ന പ്രതിപക്ഷ പാർട്ടികളുടെ ആരോപണത്തിനെതിരെ കേന്ദ്രമന്ത്രി പ്രകാശ് ജാവദേക്കർ.പാകിസ്ഥാൻ മാദ്ധ്യമങ്ങൾ ഇന്ത്യയിലെ പ്രതിപക്ഷ പാർട്ടികളുടെ പ്രസ്താവന റിപ്പോർട്ട് ചെയ്യുന്നത് പ്രദർശിപ്പിച്ചുകൊണ്ടായിരുന്നു പ്രകാശ് ജാവദേക്കറിന്റെ വിമർശനം. പ്രതിപക്ഷ നേതാക്കളുടെ ആരോപണം അടിസ്ഥാനരഹിതമാണ്. പ്രതിപക്ഷ പാർട്ടികളുടെ ഈ ആരോപണം പാകിസ്ഥാൻ ആയുധമാക്കുകയാണെന്നും പ്രകാശ് ജാവദേക്കർ കുറ്റപ്പെടുത്തി.

ജവാൻമാരുടെ ജീവത്യാഗത്തെ ബി.ജെ.പി രാഷ്ട്രീയവത്കരിക്കുകയാണെന്ന് പ്രതിപക്ഷ പാർട്ടികളുടെ കൂട്ടായ്മ സംയുക്ത പ്രസ്താവനയിലൂടെ കുറ്റപ്പെടുത്തിയിരുന്നു. പുൽവാമ ഭീകരാക്രമണത്തെ അപലപിച്ചും വിഷയം ബിജെപി രാഷ്ട്രീയ വൽക്കരിക്കുന്നതിനെ കുറ്റപ്പെടുത്തിയുമാണ് കോൺഗ്രസ് അടക്കമുള്ള 21 പാർട്ടികൾ പ്രസ്താവന ഇറക്കിയത്. യുദ്ധസമാന സാഹചര്യത്തിൽ സർവ കക്ഷിയോഗം വിളിക്കാതിരുന്ന പ്രധാനമന്ത്രിയുടെ നിലപാടിനെയും പ്രതിപക്ഷ കൂട്ടായ്മ കുറ്റപ്പെടുത്തിയിരുന്നു.