ശ്രീനഗർ: അതിർത്തിയിൽ വീണ്ടും പാക് പ്രകോപനം. കശ്‌മീരിലെ പൂഞ്ചിൽ കൃഷ്ണഘട്ടി സെക്ടറിലെ ഇന്ത്യൻ സൈനിക പോസ്റ്റുകൾക്ക് നേരെ പാക് സൈന്യം വെടിവയ്പ്പ് നടത്തി. രാവിലെ ആറ് മണിയോടെ ആരംഭിച്ച വെടിവയ്പ്പ് ഒരു മണിക്കൂറോളം നീണ്ടുനിന്നു. തുടർന്ന് ഇന്ത്യൻ സൈന്യം ശക്തമായി തിരിച്ചടിച്ചു. എ.എൻ.ഐ ആണ് റിപ്പോർട്ട് പുറത്ത് വിട്ടത്.

കഴിഞ്ഞ ദിവസവും പാകിസ്ഥാന്റെ ഭാഗത്തു നിന്ന് വലിയ രീതിയിലുള്ള പ്രകോപനം ഉണ്ടായിരുന്നു. പാകിസ്ഥാനിലെ ഭീകരകേന്ദ്രങ്ങൾ വ്യോമാക്രമണത്തിൽ തകർത്തതിന് പിന്നാലെയാണ് പാക് സൈന്യം അതിർത്തിയിൽ പ്രകോപനം തുടങ്ങിയത്. ഇന്ത്യൻ സൈനിക പോസ്റ്റുകൾക്ക് നേരെ ബുധനാഴ്ച രാവിലെയും വെടിവയ്പ്പ് നടത്തിയിരുന്നു. കൂടാതെ പാക് സൈന്യം ഷെല്ലാക്രമണവും നടത്തിയിരുന്നു.

സിയാൽകോട്ട് ഉൾപ്പെടയെുള്ള പ്രദേശങ്ങളിൽ കൂടുതൽ സൈനിക വാഹനങ്ങളും യുദ്ധ ടാങ്കുകളും എത്തിച്ച് പാകിസ്ഥാൻ സന്നാഹങ്ങൾ കൂട്ടുന്നുണ്ടെന്നാണ് റിപ്പോർട്ട്. ഇത് നിരീക്ഷണ പറക്കലാണെന്നാണ് പാക് വിശദീകരണം. അതേസമയം,​ ഇന്ത്യയും അതീവ ജാഗ്രതയിലാണ്.