കൊച്ചി: എസ്.യു.വി ശ്രേണിയിൽ ഹ്യൂണ്ടായ് അവതരിപ്പിച്ച ക്രെറ്റയുടെ വില്‌പന അ‌ഞ്ചുലക്ഷം യൂണിറ്റുകൾ കവിഞ്ഞു. 2015 വിപണിയിലെത്തിയ ക്രെറ്റ,​ നാല് വർഷത്തിനുള്ളിലാണ് ഈ നേട്ടം കുറിച്ചത്. ഇന്ത്യയിൽ നിർമ്മിക്കുന്ന ക്രെറ്റയുടെ 3.7 ലക്ഷം യൂണിറ്റുകളാണ് ആഭ്യന്തര നിരത്തിലെത്തിയത്. വിദേശ വിപണിയിൽ 1.4 ലക്ഷം യൂണിറ്റുകളും വിറ്റഴിഞ്ഞു.

രൂകല്‌പന,​ മികച്ച പ്രകടനം,​ സുരക്ഷ,​ ഉന്നത സാങ്കേതികവിദ്യ എന്നീ മികവുകളാണ് ക്രെറ്റയെ ജനപ്രിയമാക്കുന്നതെന്ന് ഹ്യൂണ്ടായ് മോട്ടോർ ഇന്ത്യ ലിമിറ്റഡ് നാഷണൽ സെയിൽസ് ഹെഡ് വികാസ് ജെയിൻ പറഞ്ഞു. 1.4 ലിറ്റർ,​ 1.6 ലിറ്റർ ശ്രേണികളിലായി പെട്രോൾ,​ ഡീസൽ എൻജിൻ വേരിയന്റുകളുള്ള ക്രെറ്റയുടെ പുതിയ പതിപ്പ് കഴിഞ്ഞവർഷം വിപണിയിൽ എത്തിയിരുന്നു. 2016ലെ 'ഇന്ത്യൻ കാർ ഒഫ് ദി ഇയർ" ഉൾപ്പെടെ 27 അവാർഡുകൾ ക്രെറ്റ നേടിയിട്ടുണ്ട്.