ദുൽക്കർ സൽമാൻ നായകനാകുന്ന ‘ഒരു യമണ്ടൻ പ്രേമകഥ’ യുടെ റിലീസ് തീയതി പ്രഖ്യാപിച്ചു. ചിത്രത്തിന്റെ തിരക്കഥാകൃത്തുക്കളായ ബിബിനും വിഷ്ണു ഉണ്ണിക്കൃഷ്ണനുമാണ് ഫേസ്ബുക്കിലൂടെ റിലീസ് തീയതി രസകരമായി പ്രഖ്യാപിച്ചത്.

ദുൽക്കർ നായകനായി എത്തുന്ന മലയാളസിനിമ റിലീസ് ചെയ്തിട്ട് 566 ദിവസങ്ങളിലേയ്ക്ക് അടുത്തുകൊണ്ടിരിക്കുകയാണെന്ന് വിഷ്ണു പറഞ്ഞു. ആ സാഹചര്യത്തിലാണ് യമണ്ടൻ പ്രേമകഥ റിലീസിനെത്തുന്നതെന്നും പ്രേക്ഷകരെപ്പോലെ തങ്ങളും ചിത്രത്തിനായുള്ള കാത്തിരിപ്പിലാണെന്നും ഇരുവരും പറഞ്ഞു.

ബിജോയ് നമ്പ്യാർ ഒരുക്കിയ സോളോയാണ് ദുൽക്കറിന്റേതായി റിലീസ് ചെയ്ത അവസാനമലയാള ചിത്രം. 2017 ഒക്ടോബർ 5 നായിരുന്നു സോളോ റിലീസ് ചെയ്തത്. ഈ ചിത്രം പുറത്തിറങ്ങി 566 ദിവസങ്ങൾക്കു ശേഷമാകും യമണ്ടൻ പ്രേമകഥ റിലീസിനെത്തുക. അതായത് ഏപ്രിൽ 25നാകും ഒരു യമണ്ടൻ പ്രേമകഥയുടെ റിലീസ്.

നവാഗതനായ ബി.സി.നൗഫലാണ് സംവിധാനം. അമർ അക്ബർ അന്തോണി, കട്ടപ്പനയിലെ ഹൃത്വിക് റോഷൻ എന്നീ ചിത്രങ്ങൾക്കു ശേഷം വിഷ്ണു ഉണ്ണിക്കൃഷ്ണൻ - ബിബിൻ ജോർജ് എന്നിവർ തിരക്കഥ ഒരുക്കുന്നു.സംയുക്ത മേനോൻ, നിഖില വിമൽ എന്നിവരാണ് നായികമാരായി എത്തുന്നത്. സൗബിൻ ഷാഹിർ, രമേശ് പിഷാരടി, ധർമ്മജൻ ബോൾഗാട്ടി,​ സലിം കുമാർ, തിരക്കഥാകൃത്തുക്കളായ വിഷ്ണു ഉണ്ണിക്കൃഷ്ണൻ, ബിബിൻ ജോർജ് എന്നിവരാണ് ചിത്രത്തിലെ മറ്റ് അഭിനേതാക്കൾ.

നാദിർഷയാണ് സംഗീതം. ഛായാഗ്രഹണം സുകുമാറും എഡിറ്റിംഗ് ജോൺകുട്ടിയും നിർവഹിക്കുന്നു. ഹാസ്യത്തിന് പ്രാധാന്യം നൽകിയിരിക്കുന്ന ചിത്രം ആന്റോ ജോസഫാണ് നിർമിക്കുന്നത്.

തമിഴിൽ വാൻ, കണ്ണും കണ്ണും കൊള്ളയടിത്താൽ, ഹിന്ദിയിൽ സോനം കപൂറിനൊപ്പം സോയാ ഫാക്​ടർ എന്നീ ചിത്രങ്ങളാണ്​ ദുൽഖറി​​​ന്റേതായി വരാനുള്ളത്​. മലയാളത്തിൽ ശ്രീനാഥ്​ രാജേന്ദ്ര​​​ന്റെ സുകുമാരക്കുറുപ്പും ഒരുങ്ങുന്നുണ്ട്​.