പരവൂർ: പതിനാല് വീലുള്ള ലോറിക്കും ടിപ്പറിനും ഇടയിൽപ്പെട്ട് സ്കൂട്ടർ യാത്രികന് ദാരുണാന്ത്യം. പരവൂർ കൂനയിൽ താമസിക്കുന്ന ചിറക്കര ബിസ്‌മില്ലയിൽ അബ്ദുൾ മജീദ് (51) ആണ് മരിച്ചത്. ഇന്നലെ വൈകിട്ട് 6 മണിയോടെ ഒല്ലാൽ റെയിൽവേ ഗേറ്റിന് സമീപം മഞ്ചാടിമൂട്ടിലായിരുന്നു അപകടം. പൂതക്കുളം ഭാഗത്ത് നിന്ന് പരവൂരിലേക്ക് വരികയായിരുന്ന ആന്ധ്രാപ്രദേശ് രജിസ്ട്രേഷനുള്ള ലോറിയെ മറികടക്കാൻ ശ്രമിക്കുന്നതിനിടയിൽ അബ്ദുൽമജീദിന്റെ സ്കൂട്ടർ എതിരെ വന്ന ടിപ്പറിൽ ഇടിച്ച ശേഷം രണ്ട് വാഹനങ്ങളുടെയും ഇടയിൽപ്പെടുകയായിരുന്നു. അബ്ദുൾ മജീദ് തൽക്ഷണം മരിച്ചു. ഓടിക്കൂടിയ നാട്ടുകാരും പൊലീസും ചേർന്ന് ലോറിക്കടിയിൽ നിന്ന് മൃതദേഹം പുറത്തെടുത്ത് ജില്ലാ ആശുപത്രി മോർച്ചറിയിലേക്ക് മാറ്റി. ഭാര്യ: റസീന. മക്കൾ: മുഹമ്മദ്ഷാ, സജിനി.

അപകടത്തെ തുടർന്ന് പാരിപ്പള്ളി - പരവൂർ റോഡിൽ മണിക്കൂറുകളോളം ഗതാഗതം തടസപ്പെട്ടു.