കൊല്ലം: ബൈപാസിൽ സ്കൂട്ടറിൽ കാറിടിച്ച് പരിക്കേറ്റ് ചികിത്സയിലായിരുന്ന സ്കൂട്ടർ യാത്രികൻ കുണ്ടറ പുലിയില ബിനുഭവനിൽ (കന്നിമേൽ) ചന്ദ്രബാബു (51) മരിച്ചു. കഴിഞ്ഞ തിങ്കളാഴ്‌ച പുലർച്ചെ 3.30ന് കൊല്ലം ബൈപാസിൽ അയത്തിലിൽ ആയിരുന്നു അപകടം. റോഡ് മുറിച്ചുകടക്കുമ്പോൾ മേവറത്ത് നിന്ന് കല്ലുംതാഴത്തേക്ക് അമിത വേഗത്തിൽ വന്ന കാർ ചന്ദ്രബാബുവിന്റെ സ്കൂട്ടറിൽ ഇടിച്ച ശേഷം നിറുത്താതെ പോവുകയായിരുന്നു. വ്യോമസേനയിൽ നിന്ന് അവധിക്ക് വന്ന മകനെ കൂട്ടിക്കൊണ്ടുവരാൻ റെയിൽവേ സ്റ്റേഷനിലേക്ക് പോകുമ്പോഴായിരുന്നു അപകടം. തിരുവനന്തപുരം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചെങ്കിലും മരിച്ചു. ഇരവിപുരം പൊലീസ് കേസെടുത്തു. മൃതദേഹം പോസ്റ്റുമോർട്ടത്തിന് ശേഷം വീട്ടുവളപ്പിൽ സംസ്‌കരിച്ചു. കശുഅണ്ടി തൊഴിലാളിയായ സുധയാണ് ഭാര്യ. മക്കൾ: ബിനു, ബിജി. മരുമകൻ: പ്രസൂൺ.