ചെറുതുരുത്തി: കേരളത്തിലെ പ്രമുഖ നാടകകൃത്തും നാടകസംവിധായകനുമാണ് തുപ്പേട്ടൻ എന്ന പേരിലറിയപ്പെടുന്ന എം. സുബ്രഹ്മണ്യൻ നമ്പൂതിരി (90) അന്തരിച്ചു. മികച്ച നാടകത്തിനുള്ള കേരള സാഹിത്യ അക്കാഡമി പുരസ്‌കാരം 2003ൽ വന്നന്ത്യേ കാണാം എന്ന നാടകത്തിലൂടെ നേടി. 1929 മാർച്ച് ഒന്നിന് തൃശൂർ ജില്ലയിലെ പാഞ്ഞാളിലെ വേദ പണ്ഡിതനായ മാമണ്ണ് ഇട്ടിരവി നമ്പൂതിരിയുടെയും ദേവകി അന്തർജ്ജനത്തിന്റെയും മകനായി ജനിച്ചു. പാഞ്ഞാൾ വിദ്യാലയം, സി.എൻ.എൻ. ഹൈസ്‌കൂൾ, ചേർപ്പ്, എസ്.എം.ടി. എച്ച്.എസ്. ചേലക്കര, മഹാരാജാസ് കോളേജ്, സ്‌കൂൾ ഒഫ് ആർട്ട്‌സ്, മദ്രാസ് എന്നിവിടങ്ങളിലായി വിദ്യാഭ്യാസം പൂർത്തിയാക്കി. ഒരു കൊല്ലം കൊച്ചിയിൽ മുണ്ടംവേലി ഹൈസ്‌കൂളിലും പിന്നീട് 27 കൊല്ലം പാഞ്ഞാൾ സ്‌കൂളിലും ചിത്രകലാ അദ്ധ്യാപകനായിരുന്നു. ഉമാദേവി ഭാര്യയും സുമ, സാവിത്രി, അജിത, രവി, രാമൻ എന്നിവർ മക്കളുമാണ്. സംസ്‌കാരം ഇന്ന് രാവിലെ ഒമ്പതിന്.