തൃശൂർ: സംസ്ഥാന സർക്കാർ ആയിരം ദിനങ്ങൾ പൂർത്തിയാക്കുന്നതിനോട് അനുബന്ധിച്ച് ജില്ലാ ഭരണകൂടം, ഇൻഫർമേഷൻ-പബ്ലിക്ക് റിലേഷൻസ് വകുപ്പ്, ജില്ലാ പഞ്ചായത്ത്, തൃശൂർ കോർപ്പറേഷൻ, ഇതര വകുപ്പുകൾ എന്നിവയുടെ നേതൃത്വത്തിൽ സംഘടിപ്പിക്കുന്ന ജില്ലാതല ആഘോഷം 20 മുതൽ 27 വരെ തേക്കിൻക്കാട് മൈതാനം വിദ്യാർത്ഥി കോർണറിൽ നടക്കും. 20 ന് വൈകീട്ട് അഞ്ചിന് മന്ത്രി അഡ്വ. വി.എസ്. സുനിൽകുമാറിന്റെ അദ്ധ്യക്ഷതയിൽ മന്ത്രി പ്രൊഫ. സി. രവീന്ദ്രനാഥ് ഉദ്ഘാടനം നിർവഹിക്കും. ഉത്പന്ന വിപണന പ്രദർശന മേളയുടെ ഉദ്ഘാടനം കോർപറേഷൻ മേയർ അജിത വിജയൻ നിർവഹിക്കും. സാംസ്‌കാരിക ഘോഷയാത്ര, ജില്ലയുടെ വികസന ചിത്രപ്രദർശനം, വിപണനമേള, സെമിനാറുകൾ, കലാപരിപാടികൾ, മണ്ഡലാടിസ്ഥാനത്തിലുള്ള പ്രവർത്തനോദ്ഘാടനങ്ങൾ എന്നിവ നടക്കും. 20 മുതൽ 26 വരെ വൈകീട്ട് കലാപരിപാടികളും അരങ്ങേറും. ഗസൽ ഗായകൻ ഷഹബാസ് അമൻ, സിനിമാ താരം ജയരാജ് വാര്യർ ഉൾപ്പെടെയുള്ളവർ കലാപരിപാടികൾ അവതരിപ്പിക്കും.