 പട്ടികയിൽ ഇനിയും പേര് ചേർക്കാം

തിരുവനന്തപുരം: പൊതുതിരഞ്ഞെടുപ്പിനുള്ള വോട്ടർപട്ടിക പ്രസിദ്ധീകരിച്ചെന്ന് സംസ്ഥാന ചീഫ് ഇലക്ടറൽ ഓഫീസർ ടീക്കാറാം മീണ വാർത്താസമ്മേളനത്തിൽ അറിയിച്ചു. നിലവിൽ 2,54,08,711 വോട്ടർമാരാണുള്ളത്. ഇതിൽ 1,31,11,189 പേർ വനിതകളും 1,22,97,403 പേർ പുരുഷൻമാരുമാണ്. 1.37 ശതമാനം വോട്ടർമാരാണ് വർദ്ധിച്ചത്.

കൂടുതൽ വോട്ടർമാരുള്ളത് മലപ്പുറത്താണ് - 30,47,923 പേർ. തൊട്ടുപിന്നിലുള്ള തിരുവനന്തപുരത്ത് 26,54,470 പേരുണ്ട്. കൂടുതൽ വനിതാ വോട്ടർമാരുള്ള ജില്ലയും മലപ്പുറമാണ് -15,26,826 പേർ. രണ്ടാം സ്ഥാനത്തുള്ള തിരുവനന്തപുരത്ത് 13,95,804 വനിതകളുണ്ട്. 119 ട്രാൻസ്‌ജെൻഡറും പട്ടികയിലുണ്ട്. കഴിഞ്ഞവർഷം ഇത് 18 ആയിരുന്നു. തിരുവനന്തപുരത്താണ് ട്രാൻസ്ജെൻഡർ വോട്ടർമാർ കൂടുതൽ - 41. തൃശൂരൂം (21), കോഴിക്കോടുമാണ് (15) യഥാക്രമം തൊട്ടുപിന്നിൽ.
66,584 പ്രവാസികളാണ് പട്ടികയിലുള്ളത്. ഈ വിഭാഗത്തിൽ 43,339 പേരുടെ വർദ്ധനയുണ്ട്. കൂടുതൽ പ്രവാസി വോട്ടർമാർ കോഴിക്കോട്ടാണ് - 22,241 പേർ. രണ്ടാംസ്ഥാനത്തുള്ള മലപ്പുറത്ത് 15,298 പേരും മൂന്നാംസ്ഥാനത്തുള്ള കണ്ണൂരിൽ 11,060 പേരുമുണ്ട്.
യുവവോട്ടർമാരുടെ എണ്ണത്തിലും വർദ്ധനയുണ്ട്. 2,61,780 പേരെ പുതുതായി ചേർക്കാനായി. കൂടുതൽ യുവവോട്ടർമാർ മലപ്പുറത്താണ് - 46,700. കോഴിക്കോടും (33,027) തൃശൂരുമാണ് (23,789) തൊട്ടുപിന്നിൽ.
സംസ്ഥാനത്തിപ്പോൾ 24,970 പോളിംഗ് ബൂത്തുകളാണുള്ളത്. നേരത്തേ 24,460 ബൂത്തുകളായിരുന്നു. അന്തിമവോട്ടർ പട്ടിക പ്രസിദ്ധീകരിച്ചെങ്കിലും ഇനിയും പേര് ചേർക്കാൻ അപേക്ഷിക്കാമെന്ന് ചീഫ് ഇലക്ടറൽ ഓഫീസർ അറിയിച്ചു. വോട്ടർമാരുടെ സഹായത്തിന് ജില്ലാതലത്തിൽ 1950 എന്ന ടോൾ ഫ്രീ നമ്പരും സി.ഇ.ഒ ഓഫീസിൽ 18004251965 എന്ന ടോൾ ഫ്രീ നമ്പരുമുണ്ട്.