അമ്പലപ്പുഴ: കരൂർ പായൽക്കുളങ്ങര ക്ഷേത്രത്തിനു സമീപം ഇന്നലെ പുലർച്ചെ ഇന്നോവ കാറും ടാങ്കറും കൂട്ടിയിടിച്ച്, ഇന്നോവയിലെ യാത്രക്കാരൻ നെടുമങ്ങാട് വേങ്കവിള ശാലിനി ഭവനിൽ മോഹൻകുമാർ - കുശലകുമാരി ദമ്പതികളുടെ മകൻ അഖിലേഷ് (27) മരിച്ചു. സുഹൃത്ത് വേങ്കവിള ഹരി നിവാസിൽ പരേതനായ ഹരിദാസിന്റെ മകൻ യിദേഷിനെ (25) ഗുരുതര പരിക്കുകളോടെ തിരുവനന്തപുരം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.

തിരുവനന്തപുരത്തു നിന്ന് എറണാകുളത്തേക്കു പോകുകയായിരുന്നു അഖിലേഷും സുഹൃത്തും. വ്യാവസായിക ഗ്യാസുമായി പോണ്ടിച്ചേരിയിൽ നിന്നു ചവറയ്ക്ക് വരികയായിരുന്ന ടാങ്കർ ലോറി നിയന്ത്രണംതെറ്റി കാറിൽ ഇടിക്കുകയായിരുന്നു . അഗ്നിശമന സംഘവും പൊലീസും ചേർന്ന് കാർ വെട്ടിപ്പൊളിച്ചാണ് ഇരുവരെയും പുറത്തെടുത്തത്. ആശുപത്രിയിൽ എത്തിച്ചപ്പോഴേക്കും അഖിലേഷ് മരിച്ചു. ഏക സഹോദരി: അഖില.