പുനലൂർ: പുനലൂർ ഇളമ്പൽ ആരംപുന്ന ബിനുഭവനിൽ ബിനുശേഖർ (45) രാജസ്ഥാനിൽ കാർ അപകടത്തിൽ മരിച്ചു.

കാറിൽ ബിനു ശേഖറിനോടൊപ്പം ഉണ്ടായിരുന്ന തകഴി പൂമംഗലം സുരേഷ്‌കുമാർ (52), പുന്നപ്ര അറവുകാട് കൊച്ചാലുംപറമ്പിൽ അനിൽകുമാർ (52) എന്നിവരും തിരിച്ചറിയാത്ത മറ്റൊരാളും മരിച്ചു. ഞായറാഴ്ച രാത്രി 11മണിയോടെ ജയ്‌പൂരിനും ഉദയപൂരിനും മദ്ധ്യേ വലോറി എന്ന സ്ഥലത്ത് കാറും ട്രക്കും കൂട്ടിയിടിച്ചായിരുന്നു മരണം.

തിങ്കളാഴ്ച പുലർച്ചെ രണ്ട് മണിയോടെയാണ് മരണ വിവരം ബന്ധുക്കൾ അറിഞ്ഞത്. സൗദി അറേബ്യയിലെ റിയാദിൽ നിന്ന് ഒരുമാസത്തെ അവധിക്ക് നാട്ടിൽവന്ന ബിനുശേഖർ രാജസ്ഥാനിൽ നഴ്സായ ഭാര്യ പ്രീതയെ കാണാൻ ഒരാഴ്ച മുമ്പാണ് ആരംപുന്നയിലെ വീട്ടിൽ നിന്ന് രാജസ്ഥാനിലേക്ക് പോയത്. ഇന്ന് ഗൾഫിലേക്ക് മടങ്ങിപ്പോകേണ്ടതായിരുന്നു. നാളെ പുലർച്ചെ നാട്ടിൽ കൊണ്ടുവരുന്ന മൃതദേഹം രാവിലെ 10.30ന് വീട്ടുവളപ്പിൽ സംസ്കരിക്കും . മക്കൾ: അർച്ചന ബി.നായർ, ആരോമൽ ബി.നായർ.