വിഴിഞ്ഞം: ആഴിമലയിൽ കടലിൽ കുളിക്കാനിറങ്ങിയ വിദ്യാർത്ഥിയെ കാണാതായി. ബാലരാമപുരം പുന്നയ്‌ക്കാട് തലയൽ നൈന്നാംകോണം ഐശ്വര്യ ഭവനിൽ കുഞ്ഞുമോൻ - സീമ ദമ്പതികളുടെ മകൻ കെ.എസ്. അഭിജിത്ത് (16) നെയാണ് കാണാതായത്. ഓലത്താന്നി വിക്‌ടറി വി.എച്ച്.എസ്.എസിലെ ഒന്നാം വർഷ കമ്പ്യൂട്ടർ സയൻസ് വിദ്യാർത്ഥിയായിരുന്നു. ഇന്നലെ വൈകിട്ട് നാലോടെയായിരുന്നു സംഭവം. നാലു ബൈക്കുകളിലായി എത്തിയ എട്ടംഗ സംഘം കടലിൽ കുളിക്കുന്നതിനിടെയാണ് അപകടം. അടിയൊഴുക്കിൽപ്പെട്ട് കടലിൽ മുങ്ങി താഴ്ന്ന അഭിജിത്തിനെ രക്ഷപ്പെടുത്താൻ ശ്രമിച്ച സുഹൃത്ത് ആകാശിന്റെ കാലിനും കൈയ്‌ക്കും പരുക്കുണ്ട്. മറ്റൊരു സുഹൃത്ത് അനിൽകുമാർ തലനാരിഴയ്‌ക്കാണ് രക്ഷപ്പെട്ടത്. തീരദേശ പൊലീസ്, മറൈൻ എൻഫോഴ്സ്‌മെന്റ് , അഗ്നിശമന സേന എന്നിവർ എത്തി തിരച്ചിൽ നടത്തി. രാത്രി നിറുത്തിവച്ച തിരച്ചിൽ ഇന്നും തുടരും. ഒപ്പമുണ്ടായിരുന്ന ഏഴു പേരെയും സ്റ്റേഷനിൽ വരുത്തി മൊഴിയെടുത്ത ശേഷം രക്ഷകർത്താക്കൾക്കൊപ്പം വിട്ടയച്ചു. ആദർശ്, ആകാശ് എന്നിവരാണ് അഭിജിത്തിന്റെ സഹോദരങ്ങൾ.