 82 കേസുകളിലായി ഇതിനകം തിരിച്ചുപിടിച്ചത് ₹65,​748 കോടി

കൊച്ചി: വായ്‌പാത്തിരിച്ചടവിൽ വീഴ്‌ച വരുത്തുന്നവർക്കെതിരെ നടപടിക്കായി കൊണ്ടുവന്ന ഇൻസോ‍ൾവൻസി ആൻഡ് ബാങ്ക്‌റപ്‌റ്റ്‌സി കോഡ് (ഐ.ബി.സി)​ ബാങ്കുകൾക്ക് നേട്ടമാകുന്നു. കഴിഞ്ഞ രണ്ടുവർഷത്തിനിടെ 82 കുടിശികക്കാരിലെ​ 1.43 ലക്ഷം കോടി രൂപയുടെ കേസുകൾ ഐ.ബി.സിയിലൂടെ പരിഹരിച്ചു. ഇതിൽ 65,​748 കോടി രൂപയും തിരിച്ചുിടിച്ചുവെന്നും ഇതു വലിയ നേട്ടമാണെന്നും ബാങ്കുകൾ വിലയിരുത്തുന്നു. ബാക്കിത്തുക വീണ്ടെടുക്കാനുള്ള നടപടികളും പുരോഗമിക്കുകയാണ്.

ആകെ 1,​627 ഐ.ബി.സി കേസുകൾ 2018 ഡിസംബർ പ്രകാരം ദേശീയ കമ്പനി നിയമ ട്രൈബ്യൂണലിന് (എൻ.സി.എൽ.ടി)​ മുന്നിലുണ്ട്. ഇതിൽ,​ 205 കേസുകളിൽ നടപടികൾ പൂർത്തിയാകുകയോ അപ്പീൽ ഹർജി സമർപ്പിക്കപ്പെട്ടത് പ്രകാരം നടപടികൾ നിറുത്തിവച്ചിരിക്കുകയോ ആണ്. ഐ.ബി.സി കേസുകൾ ആറുമാസത്തിനകം പൂർത്തിയാക്കണമെന്നാണ് ചട്ടം. 275 കേസുകൾ ഈ കാലാവധി കഴിഞ്ഞിട്ടും പരിഹരിക്കാനായിട്ടില്ല. ഈ കേസുകളുടെ പുനർനടപടികൾ സംബന്ധിച്ച അനിശ്‌ചിതത്വം തുടരുകയാണ്. ബാങ്കുകളിൽ നിന്ന് വൻതുക വായ്‌പ എടുത്തശേഷം കുടിശിക വരുത്തുന്നവർക്കെതിരെ നടപടിക്കായി 2016 ഡിസംബറിലാണ് ഐ.ബി.സി നിലവിൽ വന്നത്.