മൂവാറ്റുപുഴ: ഭാരതീയ ബാലകേന്ദ്രയുടെയും ലോക്ബന്ധുരാജ് നാരായൺജി ഫൗണ്ടേഷന്റെയും സഹകരണത്തോടെ മൂവാറ്റുപുഴ ടൗൺ യു പി സ്കൂളിൽ നടന്ന അഞ്ച് വയസു വരെയുള്ള കുട്ടികളുടെ കലോത്സവമായ ബട്ടർഫ്‌ളൈ 2019 സമാപിച്ചു. പാഠ്യ പാഠ്യേതര പ്രവർത്തനങ്ങളിൽ വേറിട്ട പ്രവർത്തനങ്ങൾ നടത്തിയ സ്‌കൂളിനുള്ള എക്‌സലൻസ് അവാർഡ് ഈസ്റ്റ് മാറാടി ഗവ. സ്‌കൂളിനും മികച്ച അദ്ധ്യാപകനുള്ള ടീച്ചർ ഐക്കൺ അവാർഡ് സമീർ സിദ്ദീഖിക്കും സാമൂഹിക പ്രതിബദ്ധതയ്ക്കുള്ള വനിതാ അവാർഡ് ചലിത ചാക്കപ്പനും ഏറ്റവും കൂടുതൽ പോയിന്റ് നേടിയ സ്‌കൂളിനുള്ള എവർറോളിംഗ് ട്രോഫി നിർമ്മല ജൂനിയർ സ്‌കൂളിനും, ഏറ്റവും കൂടുതൽ വിദ്യാർത്ഥികളെ പങ്കെടുപ്പിച്ച സ്‌കൂളായി ലിറ്റിൽ ഫ്‌ളവർ സ്‌കൂളിനെയും കലാതിലകമായി നിർമ്മല സ്‌കൂളിലെ നേല എലിസബത്തിനെയും കലാപ്രതിഭയായി ആരവ് പ്രവീണിനെയും തിരഞ്ഞെടുത്തു. മികച്ച അംഗൻവാടികളായി മഞ്ചേരിപ്പടി, പെരിങ്ങഴ അംഗൻവാടികളെയും തിരഞ്ഞെടുത്തു. സമാപന സമ്മേളനം എൽദോ എബ്രഹാം എം.എൽ.എ ഉദ്ഘാടനം ചെയ്തു. ഭാരതീയ ബാലകേന്ദ്ര ചെയർമാൻ പൂവച്ചൽ സുധീർ അദ്ധ്യക്ഷത വഹിച്ചു. നഗരസഭ ചെയർപേഴ്‌സൺ ഉഷാ ശശിധരൻ, ജില്ലാ പഞ്ചായത്തംഗം എൻ. അരുൺ, കൗൺസിലർ നൂറുദ്ദീൻ, സമീർ സിദ്ദീഖി, ഡോ. ബിജു സ്‌കറിയ, രൂപേഷ് കെ.ആർ, മുഹമ്മദ് ആസിഫ്, നുസൈഫ, മനോജ്, റോണി മാത്യു , അനന്തുകൃഷ്ണൻ തുടങ്ങിയവർ സംസാരിച്ചു.