കൊച്ചി: ഹൈക്കമാൻഡ് മുന്നോട്ടു വച്ച എ.ഐ.സി.സി ഉന്നത പദവി എറണാകുളത്ത് സീറ്റ് നിഷേധിക്കപ്പെട്ട പ്രൊഫ. കെ.വി. തോമസ് ഏറ്റെടുത്തേക്കും. അനുനയത്തിന്റെ ഭാഗമായി മൂന്ന് ഓഫറുകളാണ് നേതൃത്വം വച്ചത്. ഇതിൽ എ.ഐ.സി.സി പദവിയിൽ അദ്ദേഹം തൃപ്തനാവുകയായിരുന്നു എന്നാണ് വിവരം. ഇതുസംബന്ധിച്ച പ്രഖ്യാപനം വൈകാതെ ഉണ്ടാവുമെന്നാണ് അറിയുന്നത്. യു.ഡി.എഫ് കൺവീനർ, നിയമസഭ സീറ്റ് എന്നിവയായിരുന്നു മറ്റ് ഓഫറുകൾ. എന്നാൽ, സംസ്ഥാന രാഷ്ട്രീയത്തിൽ തീരെ താത്പര്യമില്ലാത്തതിനാൽ അദ്ദേഹം ഈ രണ്ട് വാഗ്ദാനങ്ങളും നിരാകരിക്കുകയായിരുന്നു. തുടർന്നാണ് എ.ഐ.സി.സി പദവി വാഗ്ദാനം ചെയ്തത്.

എറണാകുളത്ത് ഹൈബി ഈഡൻ എം.എൽ.എയെ സ്ഥാനാർത്ഥിയാക്കിയതോടെ നിരാശയും പാർട്ടി നിലപാടിനോടുള്ള എതിർപ്പും വെളിപ്പെടുത്തി കെ.വി തോമസ് രംഗത്ത് എത്തിയത് വലിയ വിവാദങ്ങൾക്ക് തിരികൊളുത്തിയിരുന്നു. ഡി.സി.സിയുടെയും ജില്ലയിൽ നിന്നുള്ള എം.എൽ.എമാരുടെയും എതിർപ്പാണ് കെ.വി തോമസിന് തിരിച്ചടിയത്.

സ്ഥാനാർത്ഥി പട്ടികയിൽ നിന്നും തഴയപ്പെട്ടതോടെ ഇടഞ്ഞുനിന്ന കെ.വി തോമസിനെ തങ്ങളുടെ ക്യാമ്പിലെത്തിക്കാൻ ബി.ജെ.പി ശ്രമം നടത്തിയിരുന്നു. എന്നാൽ, കോൺഗ്രസിൽതന്നെ ഉറച്ചുനിൽക്കുമെന്നായിരുന്നു അദ്ദേഹത്തിന്റെ പ്രഖ്യാപനം. അനുനയ ചർച്ചകൾ നടത്താൻ സോണിയ ഗാന്ധി ആവശ്യപ്പെട്ടതനുസരിച്ച് പ്രതിപക്ഷ നേതാവ് രമേശ് ചെന്നിത്തലയും അഹമ്മദ് പട്ടേലും നേരിട്ടെത്തി അദ്ദേഹത്തെ കണ്ടിരുന്നു. തുടർന്ന് പാർട്ടി ഏൽപ്പിക്കുന്ന ഏത് ദൗത്യവും ഏറ്റെടുക്കുമെന്ന് കെ.വി തോമസ് പറഞ്ഞു. പ്രത്യേക സാഹചര്യത്തിലാണ് താൻ പ്രതിഷേധിച്ചത്, സീറ്റു ലഭിക്കാത്തതിലല്ല, തന്നോടുള്ള സമീപനത്തിലാണ് പ്രതിഷേധമെന്നും അദ്ദേഹം പറഞ്ഞിരുന്നു.