തൃക്കാക്കര : ലോക് സഭാ തിരഞ്ഞെടുപ്പ് ഭിന്നശേഷി സൗഹൃദമാക്കി തിരഞ്ഞെടുപ്പ് കമ്മീഷൻ. ഭിന്നശേഷിക്കാർക്കായി പ്രത്യേക ആപ്ലിക്കേഷൻ തിരഞ്ഞെടുപ്പ് കമ്മീഷൻ പുറത്തിറക്കി. പി ഡബ്ല്യു ഡി ( പേഴ്സൺ വിത്ത് ഡിസബിലിറ്റി) എന്ന പേരിൽ പുറത്തിറക്കിയിരിക്കുന്ന ആപ്ലിക്കേഷൻ ഗൂഗിൾ പ്ലേ സ്റ്റോറിൽ നിന്ന് ഡൗൺലോഡ് ചെയ്ത് ഉപയോഗിക്കാവുന്നതാണ്. ഇതിലൂടെ ശാരീരിക വൈകല്യം ഉള്ളവർക്ക് തങ്ങളുടെ പ്രശ്നങ്ങൾ കമ്മീഷനെ അറിയിക്കുന്നതിനും സേവനങ്ങൾ ആവശ്യപ്പെടുന്നതിനുമുള്ള സൗകര്യമുണ്ട്.
പ്ലേസ്റ്റോറിൽ നിന്നും ആപ്ലിക്കേഷൻ ഡൗൺലോഡ് ചെയ്തതിനുശേഷം ഇഷ്ടപ്പെട്ട ഭാഷ തിരഞ്ഞെടുത്ത് മൊബൈൽ നമ്പർ ഉപയോഗിച്ച് ലോഗിൻ ചെയ്യാവുന്നതാണ്. ലോഗിൻ ചെയ്ത ശേഷം വിവിധ സേവനങ്ങളാണ് ആപ്പ് വഴി ലഭ്യമാകുന്നത്. പിഡബ്ല്യുഡി വോട്ടർ എന്ന നിലയിൽ പുതുതായി രജിസ്റ്റർ ചെയ്യുന്നതിനും, നിലവിലെ വോട്ടർ ലിസ്റ്റിൽ നിന്നും പിഡബ്ല്യുഡി വോട്ടർ ആകുന്നതിനുമുള്ള സൗകര്യം ആപ്പ് വഴി ലഭ്യമാണ്. പിഡബ്ല്യുഡി വോട്ട് രേഖപ്പെടുത്തുന്നതിനുള്ള ഓപ്ഷനിൽ വോട്ടർ ഐഡി നമ്പർ ഉപയോഗിച്ച് വിവരങ്ങൾ ചേർക്കാവുന്നതാണ്. വൈകല്യമുള്ളവർക്ക് അനുയോജ്യമായ പോളിംഗ് സ്റ്റേഷൻ ലഭ്യമാക്കുന്നതിനും, പ്രത്യേകമായ ക്യൂ ഒരുക്കുന്നതിനുമെല്ലാം രജിസ്റ്റർ ചെയ്യുന്നവർക്ക് കമ്മീഷൻ സൗകര്യമൊരുക്കും.കൂടാതെ നിലവിലെ വിവരങ്ങൾ ശരിയാക്കുന്നതിനും ഡിലീറ്റ് ചെയ്യുന്നതിനുമുള്ള ഓപ്ഷനുമുണ്ട്. വീൽചെയർ ആവശ്യമുള്ളവർക്ക് ഇതിലൂടെ ആവശ്യപ്പെടാം. പോളിങ് ബൂത്ത് എവിടെയാണെന്ന് കണ്ടെത്തുന്നതിനും നാവിഗേഷൻ സെറ്റ് ചെയ്യുന്നതിനുമുള്ള സൗകര്യവും ആപ്ലിക്കേഷൻ വഴി നൽകുന്നുണ്ട്. നിലവിലെ സ്ഥിതി വിവരങ്ങൾ അറിയുന്നതിനും അവസരമുണ്ട്. ആപ്ലിക്കേഷൻ വഴി സേവനങ്ങൾ ആവശ്യപ്പെടുന്നവരുടെ അടുത്ത് ബൂത്ത് ലെവൽ ഓഫീസർ നേരിട്ടെത്തി അന്വേഷണം നടത്തും.