ന്യൂഡൽഹി: ഇന്റർനെറ്റ് അതിവേഗമാക്കുന്ന 5ജി സ്പെക്ട്രം ലേലത്തിന് കേന്ദ്ര സർക്കാർ ഒരുങ്ങുന്നു. ടെലികോം കമ്പനികളിൽ നിന്ന് അപേക്ഷ സ്വീകരിക്കാൻ തയ്യാറെടുക്കുകയാണ് സർക്കാർ.

5ജി സ്പെക്ട്രത്തിന് വൻനിരക്കാണ് നിശ്ചയിച്ചിരിക്കുന്നതെന്ന ആരോപണങ്ങൾ അധികൃതർ ഗൗനിക്കുന്നതേയില്ല. അമിത നിരക്കായതിനാൽ ലേലത്തിൽ പങ്കെടുക്കുന്നില്ലെന്ന് ഭാരതി എയർടെൽ വ്യക്തമാക്കിയ സാഹചര്യത്തിലാണ് സർക്കാർ നിലപാട്. നിരക്ക് കുറയ്ക്കാൻ ശുപാർശ ചെയ്യില്ലെന്ന് ടെലികോം റെഗുലേറ്ററി അതോറിറ്റി ട്രായിയും വ്യക്തമാക്കിയിട്ടുണ്ട്.

കഴിഞ്ഞ വർഷം തന്നെ ട്രായ് മിനിമം നിരക്കുകൾ പ്രഖ്യാപിച്ചിട്ടുണ്ട്. ഈ വർഷം ആഗസ്റ്റോടെ സ്പെക്ട്രം ലേലം പൂർത്തിയാക്കാനാകുമെന്ന പ്രതീക്ഷയിലാണ് വാർത്താവിനിമയ മന്ത്രാലയം.

3 ജി 4ജിയായി മാറ്റുമ്പോൾ മിക്കവാറും എല്ലാ ഹാർഡ് വെയർ സാമഗ്രികളും മാറ്റേണ്ടിവന്നു. ഇനി 4ജി 5 ജിയിലേക്ക് പരിവർത്തനം ചെയ്യാൻ അത്തരം വലിയ മാറ്റങ്ങളുടെ ആവശ്യമില്ലെന്നതാണ് ഏറ്റവും വലിയ നേട്ടം.

ഇപ്പോഴത്തെ 4ജി സ്പീഡിനേക്കാൾ 15 % മുതൽ 50% വരെ ഇന്റർനെറ്റ് സ്പീഡ് വർദ്ധിക്കും. 50 mbps സ്പീഡിൽ രാജ്യത്ത് ഇന്റർനെറ്റ് സേവനം ലഭ്യമാകണമെന്നാണ് കേന്ദ്രസർക്കാരിന്റെ നയം.

മറ്റ് രാജ്യങ്ങളിലും 5 ജി സർവീസ് ആരംഭിക്കുന്നതേയുള്ളൂ. ഇറ്റലിയും ബ്രിട്ടനും സ്പെക്ട്രം ലേലം നേരത്തേ തന്നെ പൂർത്തിയാക്കിയിരുന്നു.

പ്രതി​സന്ധി​: ലേലം മാറ്റണം

ടെലി​ഫോൺ​ സേവന മേഖലയാകെ പ്രതി​സന്ധി​യി​ലാകയാൽ ഇക്കൊല്ലം 5 ജി സ്പെക്ട്രം ലേലം മാറ്റിവെക്കണമെന്ന നിലപാടിലാണ് സേവനദാതാക്കളുടെ സംഘടനയായ സെല്ലുലാർ ഓപ്പറേറ്റേഴ്സ് അസോസിയേഷൻ ഒഫ് ഇന്ത്യ ആവശ്യപ്പെട്ടിട്ടുണ്ട്. പ്രധാന മൊബൈൽ കമ്പനികളെല്ലാം തന്നെ ബിസിനസിൽ തിരിച്ചടി നേടിട്ട അവസ്ഥയിലാണ് ഇപ്പോൾ. ലക്ഷക്കണക്കിന് കോടി രൂപയാണ് സ്പെക്ട്രം ലേലത്തിലൂടെ സർക്കാരിന് ലഭിക്കുക.

എന്താണ് 5ജി​ 1980 ൽ ആദ്യ മൊബൈൽ കമ്മ്യൂണിക്കേഷൻ ടെക്നോളജിയുടെ അഞ്ചാം തലമുറയാണ് 5ജി​. 4ജി​ നെറ്റുവർക്കുകളേക്കാൾ 5 മടങ്ങ് വിനിമയ കൈമാറ്റ വേഗത. 4ജി​/എൽ.ടി​.ഇ നെറ്റ് വർക്കിനേക്കാൾ മികച്ച കവറേജും ബാൻഡ് വിഡ്ത് ലഭ്യതയും. കൂടുതൽ ആളുകൾക്കും ഉപകരണങ്ങൾക്കും കണക്ടിവിറ്റി ലഭ്യമാകും. വിദൂരനിയന്ത്രിത ശസ്ത്രക്രിയ, വെർച്വൽ റിയാലിറ്റി, സ്വയംനിയന്ത്രിത വാഹനങ്ങൾ എന്നിവയ്ക്കാവശ്യമായ മികച്ച ഡാറ്റാ സേവനങ്ങൾ ലഭ്യമാകുന്നതിനാൽ ഇവയുടെ പ്രവർത്തനം സുഗമമാകും. വീഡിയോ സ്ട്രീമിംഗ് അധിഷ്ഠിതമായ സേവനങ്ങൾ മികച്ച രീതിയിൽ ഉപഭോക്താക്കൾക്ക് ലഭിക്കും.

ന്യൂഡൽഹി: