കൊച്ചി: മുന്നാക്ക സമുദായങ്ങളിലെ പാവപ്പെട്ട വിദ്യാർത്ഥികൾക്ക് ഇക്കൊല്ലം വേണ്ടെന്ന് വച്ച സ്കോളർഷിപ്പ് കേരളകൗമുദി വാർത്തയെ തുടർന്ന് സംസ്ഥാന സർക്കാർ അനുവദിച്ചു. ഇന്നലെ രാവിലെ മുന്നാക്ക സമുദായ ക്ഷേമ കോർപറേഷൻ എം.ഡി ഡോ. കെ. അമ്പാടിയെ ധനമന്ത്രി ടി.എം. തോമസ് ഐസക് വിളിച്ചുവരുത്തി ചർച്ച നടത്തി തുക അനുവദിക്കുകയായിരുന്നു. അഞ്ചുകോടി​ രൂപ ഇന്നലെത്തന്നെ അനുവദി​ച്ച് ട്രഷറി​ അക്കൗണ്ടി​ലേക്ക് മാറ്റി​. ബാക്കി​ തുക ഗുണഭോക്താക്കളുടെ പട്ടി​ക കൈമാറുന്ന മുറയ്ക്ക് നൽകും. ഈ സ്കോളർഷി​പ്പ് ഫണ്ടി​നെ ട്രഷറി​ നി​യന്ത്രണങ്ങളി​ൽ നി​ന്നൊഴി​വാക്കി​യി​ട്ടുമുണ്ട്. മൂന്നുനാലു ദി​വസംകൊണ്ട് തന്നെ മുഴുവൻ തുകയും ലഭ്യമാകുമെന്നാണ് സൂചന.

ട്രഷറി​യി​ലെ മുന്നാക്ക ക്ഷേമ കോർപറേഷന്റെ അക്കൗണ്ടി​ൽ നി​ന്ന് ഗുണഭോക്താക്കളുടെ അക്കൗണ്ടി​ലേക്ക് നേരി​ട്ടാണ് തുക കൈമാറുക. പ്ളസ് ടു മുതൽ പ്രൊഫഷണൽ കോഴ്സുകൾക്ക് വരെ പഠി​ക്കുന്ന 24,000 പേർ ഈ പട്ടി​കയി​ലുണ്ട്.

13.6 കോടി​ രൂപയുടെ ഭരണാനുമതി​ ലഭി​ച്ച പദ്ധതി​ സാമ്പത്തി​ക പ്രതി​സന്ധി​യുടെ പേരി​ൽ നി​രസി​ച്ച് പൊതുഭരണവകുപ്പ് മാർച്ച് 16ന് ഉത്തരവാകുകയായി​രുന്നു. സാമ്പത്തികവർഷം അവസാനി​ക്കാൻ ദിവസങ്ങൾ ശേഷി​ക്കേയുള്ള ഈ നടപടി​ ഫണ്ട് ലാപ്സാക്കുമെന്ന ഘട്ടം വരെ എത്തുകയും ചെയ്തു.

17 കോടി​ രൂപ ഇക്കൊല്ലം മുന്നാക്ക സ്കോളർഷി​പ്പി​നായി​ സംസ്ഥാന ബഡ്ജറ്റി​ൽ നീക്കി​വച്ചി​രുന്നെങ്കി​ലും 13.6 കോടി​ക്ക് മാത്രമാണ് കഴി​ഞ്ഞ ജൂണി​ൽ ധനകാര്യവകുപ്പ് അനുമതി​ നൽകി​യത്. ഇതി​നാൽ കാൽ ലക്ഷത്തോളം ഹൈസ്കൂൾ വി​ദ്യാർത്ഥി​കളെ സ്കോളർഷി​പ്പി​ൽ നി​ന്ന് ഒഴി​വാക്കിയാണ്​ ഗുണഭോക്തൃലി​സ്റ്റ് തയ്യാറാക്കിയത്​.