തൊടുപുഴ: മെഡിക്കൽ കോളേജ് ഇടുക്കിയിൽ യാഥാർത്ഥ്യമാക്കിയത് എൽ.ഡി.എഫ് സർക്കാരാണെന്ന വാദം വിചിത്രമാണെന്നും പഠിക്കാൻ വിദ്യാർത്ഥികളില്ലാതെ എങ്ങനെ മെഡിക്കൽ കോളേജാവുമെന്നും സി.പി.എം മറുപടി പറയണമെന്ന് ഡി.സി.സി പ്രസിഡന്റ് ഇബ്രാഹിംകുട്ടി കല്ലാർ. 2013 മേയ് 24ന് അന്നത്തെ മുഖ്യമന്ത്രി ഉമ്മൻചാണ്ടിയാണ് ശിലാസ്ഥാപന കർമ്മം നടത്തിയത്. 2014 സെപ്‌റ്റംബർ ഒന്നിന് 50 കുട്ടികൾ പഠനം ആരംഭിക്കുകയും 2014 സെപ്‌റ്റംബർ 18ന് മെഡിക്കൽ കോളേജ് ഔദ്യോഗികമായി മുൻ മുഖ്യമന്ത്രി ഉമ്മൻചാണ്ടി ഉദ്ഘാടനം ചെയ്യുകയുമുണ്ടായി. ഇന്ത്യൻ മെഡിക്കൽ കൗൺസിലിന്റെ അംഗീകാരം വാങ്ങി പുതിയ കുട്ടികൾക്ക് മെഡിക്കൽ പ്രവേശനം യാഥാർത്ഥ്യമാക്കിയാൽ മാത്രമേ ഇടുക്കിയിലെ ജനത ഈ സർക്കാരിനെ വിശ്വസിക്കൂ എന്നിരിക്കെ അക്കാദമിക് ബ്ലോക്കിന്റെ ഉദ്ഘാടനം പാർലമെന്റ് തിരഞ്ഞെടുപ്പ് മുമ്പിൽ കണ്ടുള്ള ജോയ്‌സ് ജോർജിന്റെയും സി.പി.എമ്മിന്റെയും പാഴ്‌വേലയാണെന്നും അദ്ദേഹം പറഞ്ഞു.