ഇടുക്കി: വാഗ്ദാനങ്ങൾ പൂർണ്ണമായും നടപ്പാക്കി മുന്നോട്ടു പോകുന്ന സർക്കാരാണിതെന്ന് മന്ത്രി എം.എം. മണി പറഞ്ഞു. കാഞ്ചിയാർ പഞ്ചായത്തിൽ 2018-19 വർഷത്തിൽ ലൈഫ് ഭവനപദ്ധതി പ്രകാരം പൂർത്തീകരിച്ച വീടുകളുടെ താക്കോൽ ദാനം, അഞ്ചുരുളി സ്നാക്സ് സെന്റർ, വിശ്രമകേന്ദ്രം എന്നിവയുടെ ഉദ്ഘാടനം നിർവഹിക്കുകയായിരുന്നു അദ്ദേഹം. പ്രളയത്തിൽ വീട് നഷ്ടപ്പെട്ടവരെ പുനരധിവസിപ്പിക്കുന്ന ഉത്തരവാദിത്വം ഏറ്റെടുത്ത് നവകേരള നിർമ്മാണമാണ് സർക്കാർ നടപ്പാക്കുന്നത്. ജനോപകാരപ്രദമായ പദ്ധതികൾ ഉൾക്കൊള്ളിച്ചുള്ള നാലു മിഷനുകളാണ് സർക്കാർ വിജയകരമായി പ്രാവർത്തികമാക്കിയത്. കുടിശിഖ ഇല്ലാതെ ക്ഷേമ പെൻഷനുകൾ, ഉപാധിരഹിത പട്ടയം, ഭവന പദ്ധതികൾ തുടങ്ങി ജനങ്ങൾക്ക് നൽകിയ വാഗ്ദാനങ്ങളെല്ലാം നിറവേറ്റിയാണ് മുന്നോട്ടു പോകുന്നതെന്നും മന്ത്രി പറഞ്ഞു. കാഞ്ചിയാർ മണക്കാട്ട് സെബാസ്റ്റ്യൻ ജോസഫ് മന്ത്രിയിൽ നിന്ന് വീടിന്റെ താക്കോൽ ഏറ്റുവാങ്ങി. കഴിഞ്ഞ പ്രളയത്തിൽ മാട്ടുക്കടയിൽ വെള്ളക്കെട്ടിലകപ്പെട്ട സ്‌കൂൾ കുട്ടികളെ സാഹസികമായി രക്ഷപ്പെടുത്തിയ പേരൂശേരിൽ അജീഷ് വി.ജി, വിനൂപ് പി.വി എന്നിവർക്ക് മന്ത്രി ഉപഹാരം നൽകി അനമോദിച്ചു. കുടുംബശ്രീ മൈക്രോ സംരംഭങ്ങൾക്കുള്ള വായ്പ വിതരണ ഉദ്ഘാടനവും മന്ത്രി നിർവ്വഹിച്ചു. കാഞ്ചിയാർ വനിതാ സാംസ്‌കാരിക നിലയത്തിൽ നടന്ന ഉദ്ഘാടനയോഗത്തിന് റോഷി അഗസ്റ്റിൻ എം.എൽ.എ അദ്ധ്യക്ഷത വഹിച്ചു. ജോയ്സ് ജോർജ് എം.പി മുഖ്യപ്രഭാഷണം നടത്തി. കാഞ്ചിയാർ പഞ്ചായത്ത് പ്രസിഡന്റ് മാത്യു ജോർജ് സ്വാഗതമാശംസിച്ചു. ലൈഫ് പദ്ധതിയിൽ നിർമ്മാണം പൂർത്തീകരിച്ച 14 വീടുകളുടെ താക്കോൽദാനമാണ് ആദ്യഘട്ടത്തിൽ നടന്നത്. 16 വീടുകളുടെ നിർമ്മാണം അവസാന ഘട്ടത്തിലാണ്. 361 വീടുകൾക്കായി 15 കോടി രൂപയോളമാണ് പഞ്ചായത്ത് വകയിരുത്തിയിട്ടുള്ളത്. നടപടിക്രമങ്ങൾ പൂർത്തീകരിച്ച 165 വീടുകളുടെ നിർമ്മാണം പരോഗമിച്ചു വരുന്നു. യോഗത്തിന് മന്നോടിയായി 'ലഹരിയും സമൂഹവും ' എന്ന വിഷയത്തിൽ നടന്ന സെമിനാറിൽ കട്ടപ്പന എക്‌സൈസ് ഇൻസ്‌പെക്ടർ വിജയകുമാർ തോമസ് ക്ലാസ് നയിച്ചു. കട്ടപ്പന ബ്ലോക്ക് പഞ്ചായത്ത് പ്രസിഡന്റ് സാലി ജോളി, കാഞ്ചിയാർ പഞ്ചായത്ത് വൈസ് പ്രസിഡന്റ് വിജയകുമാരി ജയകുമാർ, ബ്ലോക്ക് പഞ്ചായത്തംഗം കാഞ്ചിയാർ രാജൻ, പഞ്ചായത്ത് സ്റ്റാൻഡിംഗ് കമ്മിറ്റി ചെയർമാന്മാരായ കെ.എൻ. ബിനു, തങ്കമണി സരേന്ദ്രൻ, ബിന്ദു മധുക്കുട്ടൻ, പഞ്ചായത്തംഗങ്ങൾ, ലൈഫ് മിഷൻ ജില്ലാ കോ- ഓർഡിനേറ്റർ പ്രവീൺ, ബി.ഡി.ഒ ബി. ധനേഷ്, പഞ്ചായത്ത് സെക്രട്ടറി പി.ടി. ഷൈലജ, കാഞ്ചിയാർ സഹകരണ ബാങ്ക് പ്രസിഡന്റ് കെ.സി. ബിജു, സി.ഡി.എസ് ചെയർപേഴ്സൺ ഷൈനി കെ.എം എന്നിവർ സംസാരിച്ചു.