തൊടുപുഴ: ഒട്ടേറെ കലാകാരന്മാരെ സംഭാവന ചെയ്ത,​ നിരവധി പ്രമുഖരുടെ കലാവിരുന്ന് തൊടുപുഴയ്ക്ക് സമ്മാനിച്ച വലിയ കലാകാരനെയാണ് കലാമന്ദിർ അപ്പച്ചൻ വിടവാങ്ങിയതോടെ നഷ്ടമാവുന്നത്. കലാമന്ദിർ ഗാനമേള കേരളത്തിലങ്ങോളാമിങ്ങോളം നിരവധി വേദികളിൽ നിറസാന്നിധ്യമായിരുന്നു. കരിങ്കുന്നം അമ്മനത്തിൽ (തെക്കേതേനംമാക്കൽ) ടി.ഒ. ചാക്കോ അദ്ധ്യാപകനായിരിക്കെയാണ് കലാരംഗത്തേക്ക് തിരിയുന്നതും കലാമന്ദിർ അപ്പച്ചനാകുന്നതും. 1965ൽ തൊടുപുഴ സെന്റ്‌ സെബാസ്റ്റ്യൻസ് ഹൈസ്‌കൂളിൽ അദ്ധ്യാപകനായി ജോലിയിൽ പ്രവേശിച്ച നാൾ മുതൽ സ്‌കൂളിലെ കലാപ്രവർത്തനങ്ങളുടെ അമരക്കാരനായിരുന്നു. 1971 ജൂൺ, വർഷകലാരംഭത്തിലെ ഒരു സായംസന്ധ്യയിൽ തൊടുപുഴയാറിന്റെ തീരത്തുള്ള ഒരു കൊച്ചുമുറിയിലാണ് കലാമന്ദിർ ആരംഭിക്കുന്നത്. മുപ്പതിലേറെ കലാകാരന്മാർ അണിനിരന്ന ഗാനമേള ട്രൂപ്പായിരുന്നു പ്രധാന ആകർഷണം. മുഖ്യ ഗായകൻ അപ്പച്ചൻ സാറായിരുന്നു. ശാസ്ത്രീയ സംഗീതം, ഹാർമോണിയം, വയലിൻ, മൃദംഗം, ഗിറ്റാർ, ഫ്ളൂട്ട്, ഡാൻസ്, ഡ്രോയിങ് തുടങ്ങിയ കലകൾ പഠിപ്പിക്കുന്നതിനുള്ള ക്ലാസുകളും ആരംഭിച്ചു. തൊടുപുഴ വിൻസൻഷ്യൻ ആശ്രമം അധികൃതർ സൗജന്യമായി കലാമന്ദിറിന് ഒരു ആസ്ഥാനവും അനുവദിച്ചു. ഇവിടെ നിരവധിപ്പേർ പലവിധ കലകൾ അഭ്യസിച്ചു. കേരളത്തിലുള്ള അമച്വർ നാടക സമിതികളെ പ്രോത്സാഹിപ്പിക്കുന്നതിനായി ഒരു സ്ഥിരം നാടകവേദി, കുട്ടികൾക്ക് വേണ്ടി ജില്ലാതല ചിത്രരചനാ മത്സരം, തുടർന്ന് നൂറോളം സെന്ററുകളിൽ സംസ്ഥാനതല മത്സരം. സി.ഒ. ആന്റോ, യേശുദാസ്, വാണിജയറാം തുടങ്ങിയവരുടെ സ്‌പെഷ്യൽ ഗാനമേളകൾ തുടങ്ങി തൊടുപുഴക്കാർക്ക് ഓർമ്മിക്കാൻ അനേകം അനുഭവങ്ങൾ അപ്പച്ചൻ സാർ സമ്മാനിച്ചിട്ടുണ്ട്. ഇരുപതോളം അമച്വർ നാടകങ്ങളിൽ അഭിനയിച്ചിട്ടുണ്ട് അദ്ദേഹം. ഗാനരചന, സംഗീത സംവിധാനം തുടങ്ങിയവയിലും പ്രാഗത്ഭ്യം തെളിയിച്ചിട്ടുണ്ട്. ഹാർമോണിയം, വയലിൻ, ഗിറ്റാർ, ഫ്ളൂട്ട് തുടങ്ങിയവയൊക്കെ ഉപയോഗിക്കാൻ അറിയാമായിരുന്നു. ഒരു കാലത്തു തൊടുപുഴ നഗരസഭയുടെ വികസന റിപ്പോർട്ടിന്റെ എഡിറ്ററായും പ്രവർത്തിച്ചിട്ടുണ്ട്. നഗരസഭയുടെ യുവജനമേളകളുടെ കൺവീനറായും പ്രവർത്തിച്ചു. 1999ൽ ആദിവാസി കലാമേള നടത്തിയതും അപ്പച്ചന്റെ നേതൃത്വത്തിലായിരുന്നു. തൊടുപുഴ വൈ.എം.സി.എ പ്രസിഡന്റ്, ഉപാസനയുടെ നേതൃത്വത്തിലുള്ള സാഹിത്യവേദിയുടെ പ്രസിഡന്റ് തുടങ്ങിയ നിലകളിലും പ്രവർത്തിച്ചു. കവിയും അഭിനേതാവും ഗായകനും പുറമെ നല്ല ഒരു സംഘാടകനെയുമാണ് അപ്പച്ചന്റെ വേർപാടിലൂടെ തൊടുപുഴയ്ക്ക് നഷ്ടമായത്. അപ്പച്ചന്റെ സംസ്‌കാര ശുശ്രൂഷകൾ നാളെ രാവിലെ 10ന് തൊടുപുഴ മുതലിയാർമഠം റോഡിൽ തെക്കനാട്ട് പാലത്തിന് സമീപമുള്ള വീട്ടിൽ ആരംഭിച്ച് കരിങ്കുന്നം, നെടിയകാട് ലില്ലിൽ ഫ്ളവർ പള്ളിയിൽ നടക്കും. ഭാര്യ: ഡോളി ചാക്കോ നെടിയശാല വാഴപ്പിള്ളിൽ കുടുംബാംഗം (റിട്ട. ഹെഡ്മിസ്ട്രസ്, ഗവ. യു.പി സ്‌കൂൾ അരിക്കുഴ). മക്കൾ: മഞ്ജു ടോമി (യു.കെ), സിഞ്ജു ജോൺസൺ. മരുമക്കൾ: ടോമി തോമസ്, വടക്കേക്കൂറ്റ്, മണലുങ്കൽ (യു.കെ), ജോൺസൺ മാത്യു തോട്ടക്കര (മൂന്നിലവ്).