ന്യൂഡൽഹി : പാകിസ്ഥാനിലെ ഭീകരക്യാമ്പുകൾക്കെതിരെ ശക്തമായ നടപടിയെടുക്കണമെന്ന് പാകിസ്ഥാന് ബ്രിട്ടീഷ് പ്രധാനമന്ത്രി തെരേസ മേയ്‌യുടെ മുന്നറിയിപ്പ്. പാകിസ്ഥാൻ പ്രധാനമന്ത്രി ഇമ്രാൻ ഖാനുമായി നടത്തിയ ഫോൺ സംഭാഷണത്തിലാണ് തെരേസ മേയ് മുന്നറിയിപ്പ് നൽകിയത്.

ഇന്ത്യ - പാക് അതിർത്തിയിലെ സംഘർഷം അയഞ്ഞതിൽ സന്തോഷമുണ്ടെന്ന് ഫോൺ സംഭാഷത്തിനിടെ തെരേസ മേയ് പറഞ്ഞു. വിംഗ് കമാൻഡർ അഭിനന്ദൻ വർദ്ധമാനെ വിട്ടയച്ച പാക് നടപടിയെയും തെരേസ മേയ് സ്വാഗതം ചെയ്തു.

ആഗോള ഭീകരതയെ നേരിടാനുള്ള പോരാട്ടത്തിൽ പാകിസ്ഥാനും ഒപ്പം നിൽക്കണമെന്ന് ആവശ്യപ്പെട്ട തെരേസ മേയ്, ഭീകരക്യാംപുകൾക്കും കേന്ദ്രങ്ങൾക്കുമെതിരെ അടിയന്തര നടപടിയെടുക്കണമെന്നും ആവശ്യപ്പെട്ടു.