ലാഹോർ: സമാധാനത്തിനുള്ള നൊബേൽ പുരസ്കാരത്തിന് താൻ അർഹനല്ലെന്ന് പാകിസ്ഥാൻ പ്രധാനമന്ത്രി ഇമ്രാൻ ഖാൻ. നോബേൽ സമ്മാനം നൽകണമെന്ന്​ ആവശ്യപ്പെട്ട് പാക് അസംബ്ലിയിൽ കഴിഞ്ഞ ദിവസം പ്രമേയം അവതരിപ്പിച്ചിരുന്നു.

പാക്​ മന്ത്രി ഫവാദ്​ ചൗധരിയാണ് ദേശീയ അസംബ്ലയിൽ ഇതുമായി ബന്ധപ്പെട്ട പ്രമേയം അവതരിപ്പിച്ചത്. ​ഇന്ത്യൻ വ്യോമസേന വിംഗ് കമാൻഡർ അഭിനന്ദൻ വർത്തമാനെ വിട്ടയക്കാനുള്ള തീരുമാനമെടുത്തത്​ പരിഗണിച്ചായിരുന്നു​ അദ്ദേഹത്തിന് പുരസ്​കാരം നൽകണമെന്ന​ ആവശ്യം ഉയർന്നത്.

ഇതിനെ തുടർന്ന് ഇമ്രാൻ ഖാന് നൊബേൽ​ പുരസ്​കാരം നൽകണമെന്ന്​ ആവശ്യപ്പെട്ട്​ സോഷ്യൽ മീഡിയയിൽ വ്യാപകമായ ക്യാംപെയിൻ നടന്നിരുന്നു. കൂടാതെ രണ്ടുലക്ഷം പേർ ഒപ്പിട്ട കത്തും ഇതിനായി തയ്യാറാക്കിയിരുന്നു.

എന്നാൽ സമാധാനത്തിനുളള നൊബേൽ പുരസ്കാരം തനിക്കല്ല ലഭിക്കേണ്ടത്. കശ്മീരിലെ പ്രശ്നം പരിഹരിക്കാൻ കഴിയുന്നവർക്കാണ് അതിന് അർഹത എന്നായിരുന്നു ഇമ്രാൻ ഖാൻ പറഞ്ഞത്. ട്വിറ്ററിലൂടെയായിരുന്നു അദ്ദേഹം തന്റെ അഭിപ്രായം വ്യക്തമാക്കിയത്.

I am not worthy of the Nobel Peace prize. The person worthy of this would be the one who solves the Kashmir dispute according to the wishes of the Kashmiri people and paves the way for peace & human development in the subcontinent.

— Imran Khan (@ImranKhanPTI) March 4, 2019

‘സമാധാനത്തിനുളള നൊബേൽ പുരസ്കാരത്തിന് ഞാൻ അർഹനല്ല. ജനങ്ങളുടെ ആഗ്രഹം പോലെ കശ്മീർ പ്രശ്നം തീർപ്പാക്കുന്നവർക്കാണ് അത് ലഭിക്കേണ്ടത്. അവിടെ സമാധാനത്തിനും ജനങ്ങളുടെ വികസനത്തിനും വേണ്ടി വഴി ഒരുക്കുന്നവർക്കാണ് അതിനുളള അർഹത’ - ഇമ്രാൻ ഖാൻ ട്വിറ്ററിൽ കുറിച്ചു.