 ജനുവരി-ഫെബ്രുവരിയിൽ വളർച്ച 13.26%

കൊച്ചി: ഇന്ത്യയിൽ നിന്നുള്ള കാപ്പി കയറ്റുമതി വീണ്ടും ഉണർവിന്റെ ട്രാക്കിൽ. 2019 ജനുവരി-ഫെബ്രുവരി കാലയളവിൽ കയറ്റുമതി 13.26 ശതമാനം വർദ്ധിച്ച് 48,​330 ടണ്ണിൽ എത്തിയെന്ന് കോഫീ ബോർഡ് വ്യക്തമാക്കി. 2018ലെ സമാനകാലയളവിൽ കയറ്റുമതി 42,​670 ടണ്ണായിരുന്നു. കാപ്പി ഉത്‌പാദനത്തിലും കയറ്റുമതിയിലും ഏഷ്യയിലെ ഏറ്റവും വലിയ മൂന്നാമത്തെ രാജ്യമാണ് ഇന്ത്യ. റോബസ്‌റ്റ,​ അറാബിക്ക ഇനങ്ങളാണ് ഇന്ത്യ ഏറ്റവുമധികം കയറ്റുമതി ചെയ്യുന്നത്.

റോബസ്‌റ്റ കയറ്റുമതി 26,​545 ടണ്ണിൽ നിന്ന് 28.42 ശതമാനം ഉയർന്ന് 34,​090 ടണ്ണിലെത്തി. 14.39 ശതമാനം വർദ്ധനയോടെ 11,​156 ടൺ അറാബിക്ക കാപ്പിയും കയറ്റുമതി ചെയ്‌തു. 2018 ജനുവരി-ഫെബ്രുവരിയിൽ അറാബിക്ക കയറ്റുമതി 9,​752 ടൺ ആയിരുന്നു. കാപ്പിയുടെ പുനർ-കയറ്റുമതി (റീ-എക്‌സ്‌പോർട്ട്)​ വിഭാഗത്തിലും മികച്ച വർദ്ധനയുണ്ടായി. 11,​516 ടണ്ണിൽ നിന്ന് 13,​392 ടണ്ണിലേക്കാണ് കുതിപ്പ്. എന്നാൽ,​ 'ഇൻസ്‌റ്റന്റ് കാപ്പി" കയറ്റുമതി നഷ്‌ടം രുചിച്ചു. 5,​704 ടണ്ണിൽ നിന്ന് 3,​047 ടണ്ണിലേക്കാണ് കയറ്റുമതി കുറഞ്ഞത്.