കൊച്ചി: ലോക്സഭാ തിരഞ്ഞെടുപ്പിൽ കേരള കോൺഗ്രസിന് ഒരു സീറ്റ് മാത്രമെ നൽകാൻ കഴിയുവെന്ന് കോൺഗ്രസ് നേതൃത്വം. കേരള കോൺഗ്രസ് നേതാക്കളുമായി ചൊവ്വാഴ്ച രാത്രി നടത്തിയ ചർച്ചയ്ക്കു ശേഷം പ്രതിപക്ഷനേതാവ് രമേശ് ചെന്നിത്തലയാണ് ഇക്കാര്യം അറിയിച്ചത്. രണ്ടാം സീറ്റ് ആവശ്യം യു.ഡി.എഫ് അന്തിമമായി നിരാകരിച്ചതോടെ മറ്റന്നാൾ പാർട്ടി യോഗം ചേർന്ന് അനന്തര തീരുമാനമെടുക്കുമെന്ന് കേരള കോൺഗ്രസും അറിയിച്ചു.

എറണാകുളം ഗസ്റ്റ് ഹൗസിൽ ഇന്ന് രാത്രി ഒമ്പതിന് ആരംഭിച്ച ചർച്ചയാണ് ഒന്നര മണിക്കൂറിനു ശേഷം ശുഭകരമാകാതെ പിരിഞ്ഞത്. രണ്ടു സീറ്റെന്ന ആവശ്യത്തിന് കോൺഗ്രസ് വഴങ്ങിയില്ല. കേരള കോൺഗ്രസിലെ ആഭ്യന്തരപ്രശ്നങ്ങൾ പാർട്ടിയിൽത്തന്നെ പരിഹരിക്കണമെന്ന നിലപാട് യു.ഡി.എഫ് സ്വീകരിച്ചതോടെ ചർച്ചകൾക്കു പരിസമാപ്തി. മറ്റന്നാൾ ചേരുന്ന പാർട്ടി യോഗം ഉചിതമായ തീരുമാനമെടുക്കുമെന്ന് കെ.എം. മാണിയും പി.ജെ. ജോസഫും പറഞ്ഞു.

രണ്ടു ലോക്സഭാ സീറ്റെന്ന ആവശ്യത്തിൽ മുറുകെപ്പിടിച്ചാണ് കേരള കോൺഗ്രസ് ചർച്ചയ്‌ക്കെത്തിയത്. കോട്ടയത്തിനു പുറമെ ഇടുക്കിയോ ചാലക്കുടിയോ കിട്ടണമെന്നായിരുന്നു ആവശ്യം. മത്സരിക്കുമെന്ന നിലപാടിൽ ഉറച്ചുനിൽക്കുന്ന പി.ജെ. ജോസഫിനെ തൃപ്തിപ്പെടുത്താൻ ലക്ഷ്യമിട്ടാണ് കെ.എം. മാണിയും രണ്ടു സീറ്റെന്ന ആവശ്യത്തിൽ വിട്ടുവീഴ്ചയ്ക്ക് തയ്യാറാകാതിരുന്നത്.രാജ്യസഭാ സീറ്റ് നൽകിയ സാഹചര്യത്തിൽ ഒരു ലോക്സഭാ സീറ്റു കൂടി അനുവദിക്കാൻ കഴിയില്ലെന്ന മുൻ നിലപാട് നേതാക്കൾ ആവർത്തിച്ചു. കെ.എം. മാണിയെ അനുനയിപ്പിക്കാൻ കോൺഗ്രസ് നേതാക്കൾ ഇന്നലെ പകൽ അനൗപചാരിക ചർച്ചകൾ നടത്തിയിരുന്നു. മാണിയുമായി അടുപ്പമുള്ള ചിലരുമായിട്ടായിരുന്നു അനുരഞ്ജന ശ്രമം. ഇടഞ്ഞുനിൽക്കുന്ന പി.ജെ. ജോസഫിനു കൂടി സ്വീകാര്യനായ ആളെ കോട്ടയത്ത് മത്സരിപ്പിക്കുകയെന്ന നിർദ്ദേശം വച്ചെങ്കിലും ധാരണയിലെത്താൻ കഴിഞ്ഞില്ലെന്നാണ് നേതാക്കൾ നൽകുന്ന സൂചന.