കൊച്ചി: ഫോബ്‌സിന്റെ ഈവർഷത്തെ ആഗോള ശതകോടീശ്വരന്മാരുടെ പട്ടികയിൽ 13,​100 കോടി ഡോളറിന്റെ ആസ്‌തിയുമായി ആമസോൺ തലവൻ ജെഫ് ബെസോസ് ഒന്നാംസ്ഥാനത്ത്. 9,​650 കോടി ഡോളർ ആസ്‌തിയുള്ള ബിൽഗേറ്ര്‌സ് (മൈക്രോസോഫ്‌റ്ര്)​ രണ്ടാമതുണ്ട്. ബെർക്‌ഷെയർ ഹാത്‌വേ ഗ്രൂപ്പ് മേധാവി വാറൻ ബഫറ്ര് (8,250 കോടി ഡോളർ), എൽ.വി.എം.എച്ച് ഗ്രൂപ്പ് സി.ഇ.ഒ ബെർണാഡ് അർണോൾട്ട് (7,600 കോടി ഡോളർ), അമേരിക്ക മുവിൽ മേധാവി കാർലോസ് സ്ളിം ഹേലു (6,400 കോടി ഡോളർ) എന്നിവരാണ് യഥാക്രം മൂന്നുമുതൽ അഞ്ചുവരെ സ്ഥാനങ്ങളിലുള്ളത്.

106 ഇന്ത്യൻ ശതകോടീശ്വരന്മാർ ഇടംപിടിച്ച ഈവർഷത്തെ പട്ടികയിലും മുകേഷ് അംബാനി തന്നെയാണ് ഇന്ത്യക്കാരനായ ഏറ്റവും വലിയ സമ്പന്നൻ, ആസ്‌തി 5,000 കോടി ഡോളർ. വിപ്രോയുടെ അസിം പ്രേംജി (2,260 കോടി ഡോളർ), എച്ച്.സി.എൽ സഹസ്ഥാപകൻ ശിവ് നാടാർ (1,460 കോടി ഡോളർ), ആഴ്സലർ മിത്തൽ തലവൻ ലക്ഷ്‌മി മിത്തൽ (1,360 കോടി ഡോളർ) എന്നിവർ തൊട്ടുപിന്നിലുണ്ട്.

മലയാളി ശതകോടീശ്വരന്മാരിൽ ഒന്നാമത് ലുലു ഗ്രൂപ്പ് ചെയർമാൻ എം.എ. യൂസഫലിയാണ്. ആസ്‌തി 470 കോടി ഡോളർ. ആഗോള റാങ്കിംഗിൽ 394-ാമതാണ് യൂസഫലി. ആർ.പി ഗ്രൂപ്പ് മേധാവി രവി പിള്ള (390 കോടി ഡോളർ), ജെംസ് എജ്യൂക്കേഷന്റെ സണ്ണി വർക്കി (240 കോടി ഡോളർ)​,​ ഇൻഫോസിസ് സഹസ്ഥാപകൻ ക്രിസ് ഗോപാലകൃഷ്‌ണൻ (220 കോടി ഡോളർ)​,​ ഇൻഫോസിസ് സഹസ്ഥാപകൻ എസ്.ഡി. ഷിബുലാൽ (140 കോടി ഡോളർ)​,​ വി.പി.എസ് ഹെൽത്ത് ഗ്രൂപ്പ് മേധാവി ഡോ. ഷംസീർ വയലിൽ (140 കോടി ഡോളർ), കല്യാൺ ജുവലേഴ്‌സ് ചെയർമാൻ ടി.എസ്. കല്യാണരാമൻ (120 കോടി ഡോളർ) എന്നിവരാണ് യഥാക്രമം പട്ടികയിലുള്ള മലയാളി ശതകോടീശ്വരന്മാർ.