നവാഗതനായ ജോൺ മന്ത്രിക്കൽ രചനയും സംവിധാനവും നിർവഹിക്കുന്ന ജനമൈത്രിയിൽ സൈജു കുറുപ്പും തരികിട സാബുവും നായകന്മാർ. മാതൃക പൊലീസ് സ്റ്റേഷൻ എന്ന പേരാണ് ആദ്യം നിശ്ചയിച്ചിരുന്നത്. എന്നാൽ പേര് മാറ്റുമെന്ന് സിറ്റി കൗമുദി റിപ്പോർട്ട് ചെയ്തിരുന്നു.
ജൂണിനുശേഷം ഫ്രൈഡേ ഫിലിം ഹൗസിന്റെ ബാനറിൽ വിജയ് ബാബു നിർമ്മിക്കുന്ന സിനിമയുടെ ചിത്രീകരണം തൊടുപുഴയിൽ ആരംഭിച്ചു.ഇർഷാദാണ് മറ്റൊരു താരം.ജനമൈത്രി പൊലീസ് സ്റ്റേഷനെ ചുറ്റിപ്പറ്റിയാണ് കഥ.കള്ളന്റെ വേഷമാണ് സൈജു കുറുപ്പിന്. പൊലീസ് വേഷത്തിൽ തരികിട സാബുവും ഡിവൈ എസ്.പിയുടെ വേഷത്തിൽ ഇർഷാദും എത്തുന്നു. അലമാര,ആൻ മരിയ കലിപ്പിലാണ് എന്നീ സിനിമകളുടെ തിരക്കഥാകൃത്താണ് ജോൺ.
അവാർഡുകൾ വാരിക്കൂട്ടിയ ഇൗ മ യൗ എന്ന ചിത്രത്തിനുശേഷം ലിജോ ജോസ് പല്ലിശ്ശേരി സംവിധാനം ചെയ്യുന്ന ജെല്ലിക്കെട്ടിൽ ആന്റണി വർഗീസിനോടൊപ്പം പ്രധാന വേഷം അവതരിപ്പിക്കുന്നത് സാബുവാണ്. നേരത്തെ വിനായകന് നീക്കിവച്ചിരുന്ന വേഷമാണിത്. അമിതപ്രതിഫലം ആവശ്യപ്പെട്ടതിനെത്തുടർന്നാണ് വിനായകനുപകരം സാബുവിനെ ലിജോ കാസ്റ്റ് ചെയ്തതെന്നാണ് വാർത്തകൾ.