വൃക്കയിൽ സൂചി കൊണ്ട് പാതയൊരുക്കി അത് വികസിപ്പിച്ച്, വൃക്കയിലേക്ക് നെഫ്രോസ്കോപ് ഉപകരണം ഇറക്കി കല്ലുകൾ കണ്ട്, പൊടിച്ചു നീക്കം ചെയ്യുന്ന മാർഗമാണ് പി.സി.എൻ.എൽ. എത്ര വലിപ്പമുള്ള കല്ലുകളും പി.സി.എൻ.എൽ ചികിത്സ വഴി പൂർണമായി നീക്കം ചെയ്യാം. വൃക്കയിൽ വളരെ കുറച്ച് ക്ഷതം മാത്രമേ സംഭവിക്കുന്നുള്ളൂ. പലതവണ പി.സി.എൻ.എൽ ശസ്ത്രക്രിയ ചെയ്യാം. വൃക്കയിലെ അടവുകൾ വലുതാക്കുന്നതിനും, ഈ മാർഗത്തിലൂടെ സാദ്ധ്യമാണ്.
ട്രാൻസ്പ്ളാന്റ് വൃക്കയിൽ ഉണ്ടാകുന്ന കല്ലുകൾക്കുള്ള ഏറ്റവും അഭികാമ്യമായ ചികിത്സയാണ് പി.സി.എൻ.എൽ. മൂത്രരോഗാണുബാധയുള്ള രോഗികൾക്ക് അത് ചികിത്സിച്ച് ഭേദമാക്കിയശേഷമേ പി.സി.എൻ.എൽ ചെയ്യാൻ പാടുള്ളൂ. വിവിധങ്ങളായ ഊർജ്ജ സ്ത്രോതസുകൾ ഉദാഹരണത്തിന് അൾട്രാസൗണ്ട്, ലിതോക്ളാസ്റ്റ്, ലേസർ മുതലായവ വഴി വലിപ്പമേറിയ കല്ലുകൾ പൊടിച്ച് നീക്കം ചെയ്യുകയാണ് പി.സി.എൻ.എൽ ചെയ്യുന്നത്. വളരെ കുറച്ച് നെഫ്രോണുകൾ മാത്രമേ ഈ ചികിത്സയിൽ നഷ്ടപ്പെടുന്നുള്ളൂ.
മിനി PCNL അടുത്തകാലത്തായി പ്രചാരത്തിലുണ്ട്. വൃക്കയിലേക്ക് ട്യൂബ്, നെഫ്രോസ്കോപ് ഇവയുടെ വലിപ്പം കുറച്ച് PCNL ചെയ്യുന്ന രീതിയാണ് ഇത്. രക്തനഷ്ടം വളരെ കുറവായിരിക്കും. വൃക്കയിലെ വലിപ്പമുള്ള കല്ലുകൾ 1 സെ.മീ. താഴെയുള്ള മുറിവിൽ കൂടി പൂർണമായി നീക്കം ചെയ്യാൻ സാധിക്കുന്നു. തുറന്നുള്ള ശസ്ത്രക്രിയയുമായി താരതമ്യം ചെയ്യുമ്പോൾ വേദന നിസാരമാണ്. സാധാരണ ജീവിതത്തിലേക്ക് വളരെ പെട്ടെന്ന് തിരികെ പോകാൻ സാധിക്കുന്നു എന്നതാണ് PCNL ചികിത്സയുടെ ആകർഷണീയത.