കൊച്ചി: ആരോഗ്യരംഗത്ത് സഹകരിച്ച് പ്രവർത്തിക്കാൻ കേരളത്തിന് കിഴക്കൻ യൂറോപ്പ്യൻ രാജ്യമായ മോൾഡോവയുടെ ക്ഷണം. മോൾഡോവ ദേശീയ മെഡിക്കൽ സർവകലാശാലയുടെ ചാൻസലറും മുൻ ആരോഗ്യ മന്ത്രിയുമായ ഡോ. ഇയോൺ അബാബിയുടെ നേതൃത്വത്തിലുള്ള സംഘം മുഖ്യമന്ത്രി പിണറായി വിജയൻ,​ മന്ത്രി കെ.കെ. ഷൈലജ,​ അഡിഷണൽ ചീഫ് സെക്രട്ടറി രാജീവ് സദാനന്ദൻ എന്നിവരുമായി ഇതുസംബന്ധിച്ച് കൂടിക്കാഴ്‌ച നടത്തി.

മറ്ര് സംസ്ഥാനങ്ങളെ അപേക്ഷിച്ച് കേരളത്തിന്റെ ഉയർന്ന പൊതുജനാരോഗ്യ നിലവാരം,​ പകർച്ചവ്യാധി നിയന്ത്രണത്തിലുള്ള മികച്ച പ്രവർത്തനങ്ങൾ എന്നിവയിൽ സർക്കാർ കാഴ്‌ചവയ്‌ക്കുന്ന മികവിനെ ലോക ആരോഗ്യ സംഘടനാ എക്‌സിക്യൂട്ടീവ് അംഗം കൂടിയായ ഡോ. അബാബി പ്രശംസിച്ചു. സ്‌റ്റുഡന്റ് ഇന്റേൺഷിപ്പിന് കേരളത്തിലെ തിരഞ്ഞെടുത്ത മെഡിക്കൽ കോളേജുകൾ,​ സ്വകാര്യ ആശുപത്രികൾ എന്നിവയുമായി ധാരണയ്ക്ക് താത്പര്യമുണ്ടെന്ന് അദ്ദേഹം പറഞ്ഞു. ഒരുമാസം മുതൽ ആറുമാസം വരെയുള്ള ഇന്റേൺഷിപ്പുകൾക്ക് വിദേശത്തു നിന്ന് കേരളത്തിൽ വിദ്യാർത്ഥികളെത്തും. നിലവിൽ 36 രാജ്യങ്ങളിൽ നിന്നായി 6,​200 വിദ്യാർത്ഥികൾ മോൾഡോവൻ സർവകലാശാലയിൽ പഠിക്കുന്നുണ്ട്.

മുഖ്യമന്ത്രി,​ ആരോഗ്യമന്ത്രി,​ ആരോഗ്യ വകുപ്പ് സെക്രട്ടറി എന്നിവർക്ക് മോൾഡോവ സന്ദർശിക്കാനുള്ള ക്ഷണവും സംഘം കൈമാറി. മോൾഡോവൻ സർവകലാശാലയിൽ ആയുർവേദ ചെയർ സ്ഥാപിക്കാൻ സന്നദ്ധമാണെന്നും സംഘം അറിയിച്ചു. സർവകലാശാല വൈസ് റെക്‌ടർ ഡോ. ഇഗോർ സെമോർട്ടർ,​ പ്രൊഫ. ലുഡ്‌വില അബാബി,​ ഇന്ത്യൻ പ്രതിനിധി ആർ. മനു,​ ഔഷധി ചെയർമാൻ ഡോ.കെ.ആർ. വിശ്വംഭരൻ എന്നിവരും ഒപ്പമുണ്ടായിരുന്നു.