ശബരിമല യുവതീ പ്രവേശനത്തിനായുള്ള സുപ്രീംകോടതി വിധിയെ മതവികാരം ഇളക്കി വിടുന്ന തരത്തിൽ പ്രചരിപ്പിച്ചാൽ തിരഞ്ഞെടുപ്പ് പെരുമാറ്റച്ചട്ട ലംഘനമാകുമെന്ന സംസ്ഥാന മുഖ്യ തിരഞ്ഞെടുപ്പ് ഓഫീസർ ടിക്കാറാം മീണയുടെ മുന്നറിയിപ്പ് വീണ്ടും തള്ളി ബി.ജെ.പി നേതാവ് കെ. സുരേന്ദ്രൻ. മുഖ്യമന്ത്രി പിണറായി വിജയന്റെ ഫേസ്ബുക്ക് പോസ്റ്റ് തെളിവായി നൽകി ഇതും മുഖ്യ തെരഞ്ഞെടുപ്പ് ഓഫീസർ മുഖ്യമന്ത്രിയുടെ ഈ പ്രസ്താവന കണ്ടുകാണുമോ എന്ന് ചോദിച്ചാണ് കെ.സുരേന്ദ്രൻ ഫേസ്ബുക്കിൽ പോസ്റ്റ് ചെയ്തിരിക്കുന്നത്.

ആറ്റിങ്ങൽ മണ്ഡലത്തിലെ എൽ.ഡി.എഫിന്റെ തെരഞ്ഞെടുപ്പ് കൺവെൻഷൻ ഉദ്ഘാടനം ചെയ്ത് സംസാരിക്കവേ രാജ്യത്തിന്റെ മതനിരപേക്ഷതയുടെ പ്രതീകമായ ബാബറി മസ്ജിദ് സംഘപരിവാർ തകർത്തുവെന്ന മുഖ്യമന്ത്രിയുടെ പ്രസ്താവന ഫേസ്ബുക്കിൽ വന്നതിന്റെ ചിത്രസഹിതമാണ് കെ. സുരേന്ദ്രൻ പോസ്റ്റ് ചെയ്തിരിക്കുന്നത്.

ശബരിമല തകർക്കാൻ പിണറായി വിജയനും കൂട്ടരും നടത്തിയ ഗൂഡനീക്കം ജനങ്ങളോട് പറയുക തന്നെചെയ്യുമെന്നും തെരഞ്ഞെടുപ്പു കമ്മീഷണർ അമിതാധികാരപ്രയോഗം നടത്തിയാൽ അതംഗീകരിക്കാനാവില്ലെന്നും കെ.സുരേന്ദ്രൻ ആരോപിക്കുന്നു.