 അസംസ്‌കൃത വസ്‌തു വാങ്ങൽച്ചെലവ് കുറയ്‌ക്കാൻ നടപടിയെടുക്കും

കൊച്ചി: സംസ്ഥാന പൊതുമേഖലാ കാലിത്തീറ്റ നിർമ്മാണ കമ്പനിയായ കേരള ഫീഡ്‌സ് ലിമിറ്രഡ് 2020-21 സാമ്പത്തിക വർഷത്തോടെ 500 കോടി രൂപയുടെ വിറ്റുവരവ് ലക്ഷ്യമിടുന്നു. 2017-18ൽ 375 കോടി രൂപയായിരുന്നു വിറ്റുവരവ്. നടപ്പുവർഷം ഇത് 400 കോടി രൂപ കടക്കുമെന്നാണ് പ്രതീക്ഷ. 74 കോടി രൂപ നിക്ഷേപത്തോടെ തൊടുപുഴയിൽ സ്ഥാപിക്കുന്ന,​ കമ്പനിയുടെ നാലാമത്തെ പ്ളാന്റിന്റെ പ്രവർത്തനം രണ്ടുമാസത്തിനകം നടക്കും. അതോടെ,​ വിറ്റുവരവിൽ വൻ കുതിപ്പ് നേടാനാകുമെന്ന് മാനേജിംഗ് ഡയറക്‌ടർ ഡോ.ബി. ശ്രീകുമാർ പറഞ്ഞു.

500 ടണ്ണാണ് തൊടുപുഴ പ്ളാന്റിന്റെ ഉത്‌പാദനശേഷി. തൃശൂർ കല്ലേറ്റുംകര,​ കരുനാഗപ്പള്ളി,​ കോഴിക്കോട് എന്നിവിടങ്ങളിലാണ് നിലവിലെ പ്ളാന്റുകൾ. യൂറോപ്പ്യൻ സാങ്കേതികവിദ്യയുള്ള പ്ളാന്റുകളുടെ 95 ശതമാനം പ്രവർത്തനവും യന്ത്രകേന്ദ്രീകൃതമാണ്. 650 ടൺ ശേഷിയുള്ള കല്ലേറ്റുംകര പ്ളാന്റാണ് വലുത്. കരുനാഗപ്പള്ളിയിലും കോഴിക്കോട്ടും ശേഷി 300 ടൺ വീതം. ദിവസേന 15 ലിറ്രറിലേറെ പാൽ തരുന്ന പശുക്കൾക്കുള്ള എലൈറ്റ്,​ 10 ലിറ്ററിനുമേൽ പാൽ തരുന്ന പശുക്കൾക്കുള്ള മിടുക്കി,​ 10 ലിറ്ററിന് താഴെ കറവയുള്ള പശുക്കൾക്കുള്ള റിച്ച് എന്നീ കാലിത്തീറ്റ ബ്രാൻഡുകളാണ് കമ്പനിക്കുള്ളത്.

ഉന്നത ഗുണനിലവാരവും ഉയർന്ന പ്രോട്ടീനുമാണ് ഇവയുടെ പ്രത്യേകതയെന്ന് ചെയർമാൻ കെ.എസ്. ഇന്ദുശേഖരൻ നായർ പറഞ്ഞു. റിച്ചിന് 1,​070 രൂപ,​ മിടുക്കിക്ക് 1,​095 രൂപ,​ എലൈറ്രിന് 1,​175 രൂപ എന്നിങ്ങനെയാണ് വില. 50 കിലോഗ്രാമിന്റെ ചാക്കുകളാണ് വിപണിയിലെത്തിക്കുന്നത്. 2015-18 കാലയളവിൽ അസംസ്‌കൃത വസ്‌തുക്കളുടെ വില 35 ശതമാനം വരെ കൂടിയത് കമ്പനിക്ക് വലിയ തിരിച്ചടിയായി. നഷ്‌ടം ക്ഷീരകർഷകരിലേക്ക് അടിച്ചേല്‌പ്പിക്കാതിരിക്കാനായി കാലിത്തീറ്റയുടെ വില കമ്പനി കൂട്ടിയിരുന്നില്ല. എന്നാൽ,​ ഈമാസം ഒമ്പതിന് ചാക്കിന് 25 രൂപ കൂട്ടി. എന്നിട്ടും ചാക്കിന് ശരാശരി 60 രൂപയുടെ നഷ്‌ടം കമ്പനി നേരിടുന്നുണ്ട്.

അസംസ്‌കൃത വസ്‌തുക്കളായ ചോളം,​ തവിട്,​ പരുത്തിക്കുരു തുടങ്ങിയവ കേരളത്തിന് പുറത്തുനിന്നാണ് കമ്പനി വാങ്ങുന്നത്. 2017-18ൽ കമ്പനിയുടെ മൊത്തം ചെലവിൽ 83 ശതമാനവും അസംസ്കൃത വസ്‌തുക്കൾ വാങ്ങാനായിരുന്നു. നടപ്പുവർഷം ഇത് 90 ശതമാനം ആയിട്ടുണ്ട്. ഇ-ടെൻഡറിലൂടെയാണ് ഇപ്പോൾ അസംസ്‌കൃത വസ്‌തുക്കൾ വാങ്ങുന്നത്. ദീർഘകാല കരാറിലേർപ്പെട്ട് വാങ്ങൽച്ചെലവ് കുറയ്‌ക്കുന്നത് ആലോചനയിലുണ്ടെന്ന് ഡോ. ബി. ശ്രീകുമാർ പറഞ്ഞു.

നഷ്‌ടം ₹10 കോടിയിലേക്ക്

കേരള ഫീഡ്‌സിന്റെ മൊത്തം പ്രവർത്തന നഷ്‌ടം 72 കോടി രൂപയാണ്. 2016-17ൽ 32 കോടി രൂപയുടെ നഷ്‌ടം കമ്പനി രേഖപ്പെടുത്തി. 2017-18ൽ ഇത് രണ്ടു കോടി രൂപയായി കുറഞ്ഞു. നടപ്പുവർഷം ലാഭത്തിലേറുമെന്ന് പ്രതീക്ഷിച്ചെങ്കിലും പ്രളയം തിരിച്ചടിയായി. നടപ്പുവർഷം ഏപ്രിൽ-ജൂണിൽ 75 ലക്ഷം രൂപയുടെ ലാഭമുണ്ടായിരുന്നു. ജൂലായ്-ഡിസംബർ കാലയളവിൽ പ്രളയംമൂലം പത്തു കോടി രൂപയുടെ നഷ്‌ടമുണ്ടായി. ഈവർഷം ആകെ പ്രതീക്ഷിക്കുന്ന നഷ്‌ടം പത്തു കോടി രൂപ.

4,​000 ടൺ

അഞ്ചുലക്ഷത്തോളം ക്ഷീരകർഷകരുണ്ട് കേരളത്തിൽ. പ്രതിദിനം 4,​000 ടൺ കാലിത്തീറ്റ കേരളത്തിൽ വിറ്റഴിയുന്നു. ഇതിൽ 1,​000-1200 ടൺ വിഹിതമാണ് കേരള ഫീഡ്‌സിനുള്ളത്.

3,​500 ഡീലർമാർ

കേരളം മാത്രമാണ് കേരള ഫീഡ്‌സിന്റെ വിപണി. 3,​500 ഡീലർമാരുണ്ട്. തൊടുപുഴ പ്ളാന്റ് തുറക്കുന്നതോടെ മറ്ര് സംസ്‌ഥാനങ്ങളിലേക്കും ചുവടുവയ്‌ക്കും. തൊടുപുഴ പ്ളാന്റ് പ്രവർത്തനസജ്ജമാകുമ്പോൾ,​ കേരളത്തിനാവശ്യമായ കാലിത്തീറ്റയുടെ 50 ശതമാനം പൊതുമേഖലയിൽ ഉത്‌പാദിപ്പിക്കാനാകും.

ക്ഷീരകർഷകർക്ക്

വായ്‌പാ പദ്ധതി

എസ്.ബി.ഐയുമായി സഹകരിച്ച് സംസ്‌ഥാനത്തെ ക്ഷീരകർഷകർക്ക്,​ സൊസൈറ്രികൾ വഴി വായ്‌പാസഹായം നൽകാൻ കേരള ഫീഡ്‌സ് ആലോചിക്കുന്നുണ്ട്. രണ്ടുമാസത്തിനകം പദ്ധതി നടപ്പാക്കുമെന്ന് മാനേജിംഗ് ഡയറക്‌ടർ ഡോ.ബി. ശ്രീകുമാർ 'കേരളകൗമുദി"യോട് പറഞ്ഞു. പശുക്കളുടെ എണ്ണത്തിന് അനുസരിച്ച് വായ്‌പാത്തുക നിശ്‌ചയിക്കും. ക്ഷീരമേഖലയുടെ വികസനമാണ് ലക്ഷ്യം. 8.9 ശതമാനമായിരിക്കും പലിശ.