കോഴിക്കോട്: എസ്.ഡി.പി.ഐ പോപ്പുലർ ഫ്രണ്ട് നേതാക്കളുമായി മുസ്ലീം ലീഗ് രഹസ്യചർച്ച നടത്തിയതായി റിപ്പോർട്ട്. ലീഗ് നേതാക്കളും മലപ്പുറം-പൊന്നാനി മണ്ഡലങ്ങളിലെ പാർട്ടി സ്ഥാനാർത്ഥികളുമായ പി.കെ.കുഞ്ഞാലിക്കുട്ടി, ഇ.ടി. മുഹമ്മദ് ബഷീർ എന്നിവരാണ് പോപ്പുലർ ഫ്രണ്ട് - എസ്.ഡി.പി.ഐ നേതാക്കളുമായി ചർച്ച നടത്തിയത്.

പോപ്പുലർ ഫ്രണ്ട് സംസ്ഥാന അദ്ധ്യക്ഷൻ നസറൂദ്ദീൻ എളമരം, എസ്‍.ഡി.പി.ഐ സംസ്ഥാന അദ്ധ്യക്ഷൻ അബ്ദുൾ മജീദ് ഫൈസി എന്നിവരുമായിട്ടായിരുന്നു ചർച്ച. കൊണ്ടോട്ടിയിലെ കെ.ടി.ഡി.സി ഹോട്ടലിൽ വച്ച് ഇന്നലെ രാത്രിയോടെയാണ് നേതാക്കൾ കൂടിക്കാഴ്ച്ച നടത്തിയത്.

എന്നാൽ പോപ്പുലർഫ്രണ്ട്,​ എസ്.ഡി.പി.ഐ നേതാക്കളുമായി ചർച്ച നടത്തിയിട്ടില്ലെന്ന് ഇ.ടി. മുഹമ്മദ് ബഷീർ പ്രതികരിച്ചു. കെ.ടി.ഡി.സി ഹോട്ടലിൽവച്ച് യാദൃശ്ചികമായി പോപ്പുലർ ഫ്രണ്ട് നേതാക്കളെ കണ്ടുമുട്ടുക മാത്രമായിരുന്നു സംഭവിച്ചതെന്നും ബഷീർ പറഞ്ഞു. എസ്.ഡി.പി.ഐയുമായി ചർച്ച ചെയ്യേണ്ട കാര്യം ലീഗിനില്ലെന്നും ബഷീർ വ്യക്തമാക്കി.