 കാർഡില്ലാതെ എ.ടി.എമ്മിൽ നിന്ന് പണം പിൻവലിക്കാം

മുംബയ്: കാർഡില്ലാതെ എ.ടി.എമ്മിൽ നിന്ന് പണം പിൻവലിക്കാവുന്ന 'യോനോ ക്യാഷ്" സംവിധാനം എസ്.ബി.ഐ അവതരിപ്പിച്ചു. എസ്.ബി.ഐയുടെ 16,​500ലേറെ വരുന്ന എ.ടി.എമ്മുകളിൽ ഈ സേവനം ലഭിക്കും. 'യോനോ ക്യാഷ് പോയിന്റ്" എന്നാണ് ഇത്തരം എ.ടി.എമ്മുകൾ അറിയപ്പെടുക.

യോനോ ആപ്പ് മുഖേനയാണ് പണം പിൻവലിക്കാനാവുക. ഇതിനായി,​​ ആറക്ക പിൻ നമ്പർ ഉപഭോക്താവ് തയ്യാറാക്കണം. ഉപഭോക്താവിന്റെ രജിസ്‌റ്റർ ചെയ്‌ത മൊബൈൽ നമ്പറിലേക്ക് ആറക്ക യോനോ ക്യാഷ് പിൻ എസ്.എം.എസ് ആയും ലഭിക്കും. തുടർന്ന്,​ അരമണിക്കൂറിനകം എസ്.ബി.ഐ എ.ടി.എമ്മിൽ നിന്ന് പിൻ നമ്പറും റഫറൻസ് നമ്പറും ഉപയോഗിച്ച് പണം പിൻവലിക്കാം.

എ.ടി.എം കാർഡുകൾ എ.ടി.എം മെഷീനുകളിൽ ഉപയോഗിക്കുമ്പോൾ തട്ടിപ്പുകൾക്ക് ഇരയാകുന്ന സാദ്ധ്യത ഇല്ലാതാക്കാൻ യോനോ ക്യാഷ് സംവിധാനം സഹായിക്കുമെന്ന് എസ്.ബി.ഐ വ്യക്തമാക്കി. പദ്ധതി മുഖേന,​ ഡെബിറ്ര് കാർഡ് ഇല്ലാതെ തന്നെ പണം പിൻവലിക്കാം. രണ്ടുവർഷത്തിനകം യോനോ വഴി എല്ലാ ഇടിപാടുകളും ഒരൊറ്റ കുടക്കീഴിലാക്കി ഒരു ഡിജിറ്രൽ ലോകം ഒരുക്കാനാണ് എസ്.ബി.ഐ ലക്ഷ്യമിടുന്നതെന്ന് ചെയർമാൻ രജനീഷ് കുമാർ പറഞ്ഞു. 85 ഇ-കൊമേഴ്‌സ് സ്ഥാപനങ്ങളുടെ ഉത്‌പന്നങ്ങളും സേവനങ്ങളും ലഭ്യമാക്കുന്ന ആദ്യത്തെ സമഗ്ര ഡിജിറ്റൽ ബാങ്കിംഗ് പ്ളാറ്റ്‌ഫോമാണ് എസ്.ബി.ഐ യോനോ. 2017ൽ അവതരിപ്പിച്ച യോനോ, കഴിഞ്ഞ ഫെബ്രുവരി വരെ 1.8 കോടിയിലേറെ പേരാണ് ഡൗൺലോഡ് ചെയ്‌തത്.