കൊച്ചി: കയറ്റുമതിയിലെ നേരിയ നേട്ടവും ഇറക്കുമതി ചെലവിലുണ്ടായ ഇടിവും ഇന്ത്യയുടെ വ്യാപാരക്കമ്മിയെ കഴിഞ്ഞമാസം 17 മാസത്തെ താഴ്‌ചയിലേക്കെത്തിച്ചു. കയറ്റുമതി വരുമാനവും ഇറക്കുമതിച്ചെലവും തമ്മിലെ അന്തരമായ വ്യാപാരക്കമ്മി ഫെബ്രുവരിയിൽ 960 കോടി ഡോളറാണ്. ജനുവരിയിൽ ഇത് 1,​473 കോടി ഡോളറും കഴിഞ്ഞവർഷം ഫെബ്രുവരിയിൽ 1,​230 കോടി ഡോളറും ആയിരുന്നു. മുമ്പ്,​ വ്യാപാരക്കമ്മി ഏറ്റവും കുറവ് രേഖപ്പെടുത്തിയത് 2017 സെപ്‌തംബറിലാണ്; 940 കോടി ഡോളർ.

കഴിഞ്ഞ നവംബർ മുതൽ ഇന്ത്യയുടെ കയറ്റുമതിമേഖല കാഴ്‌ചവയ്‌ക്കുന്നത് നിർജീവ പ്രകടനമാണ്. 0.8 ശതമാനം മാത്രമായിരുന്നു വളർച്ച. ഡിസംബറിൽ 0.34 ശതമാനം,​ ജനുവരിയിൽ 3.74 ശതമാനം എന്നിങ്ങനെയും വളർന്നു. 2.44 ശതമാനം മാത്രം നേട്ടവുമായി 2,​667 കോടി ഡോളർ വരുമാനമാണ് കഴിഞ്ഞമാസം നേടിയത്. 2018 ഫെബ്രുവരിയിൽ കയറ്റുമതി 2,​603 കോടി ഡോളറിന്റേതായിരുന്നു.

ഇറക്കുമതി അപ്രതീക്ഷിതമായി നെഗറ്റീവ് വളർച്ചയിലേക്ക് വീണതാണ് കഴിഞ്ഞമാസം വ്യാപാരക്കമ്മി കുത്തനെ കുറയാൻ സഹായകമായത്. ജനുവരിയിൽ 0.01 ശതമാനം വളർച്ച രേഖപ്പെടുത്തിയ ഇറക്കുമതി,​ ഫെബ്രുവരിയിൽ നെഗറ്റീവ് 5.41 ശതമാനം ഇടിഞ്ഞു. 3,​626 കോടി ഡോളറിന്റെ ഇറക്കുമതിയാണ് കഴിഞ്ഞമാസം നടന്നത്.

നടപ്പു സാമ്പത്തിക വർഷം ഏപ്രിൽ-ഫെബ്രുവരി കാലയളവിൽ കയറ്റുമതി നേട്ടം 8.85 ശതമാനം വർദ്ധിച്ച് 29,​847 കോടി ഡോളറായിട്ടുണ്ട്. ഇറക്കുമതിച്ചെലവ് 9.75 ശതമാനം ഉയർന്ന് 46,​400 കോടി ഡോളറിലുമെത്തി. ഇക്കാലയളവിൽ വ്യാപാരക്കമ്മി 16,​552 കോടി ഡോളറാണ്. 2017-18ലെ സമാനകാലയളവിൽ ഇത് 14,​885 കോടി ഡോളറായിരുന്നു.

പ്രധാന മേഖലകൾ തളർച്ചയിൽ

ജെം ആൻഡ് ജുവലറി,​ എൻജിനിയറിംഗ്,​ പെട്രോകെമിക്കൽ മേഖലകളുടെ മോശം പ്രകടനമാണ് ഇന്ത്യയുടെ കയറ്റുമതി വരുമാനത്തെ ബാധിക്കുന്നത്. ജെം ആൻഡ് ജുവലറി രണ്ടു ശതമാനവും പെട്രോളിയം ഉത്‌പന്നങ്ങൾ 7.7 ശതമാനവും തളർന്നതാണ് പ്രധാന തിരിച്ചടി. ഔഷധങ്ങൾ 16.1 ശതമാനം,​ കെമിക്കൽ 4.1 ശതമാനം,​ വസ്‌ത്രങ്ങൾ 7.1 ശതമാനം എന്നിങ്ങനെ നേട്ടമുണ്ടാക്കി.

സ്വർണം ഇറക്കുമതി11% കുറഞ്ഞു

വ്യാപാരക്കമ്മിക്ക് പ്രധാന കാരണങ്ങളായ സ്വർണം,​ ക്രൂഡോയിൽ,​ ഇലക്‌ട്രോണിക്‌സ് എന്നിവയുടെ ഇറക്കുമതി ഫെബ്രുവരിയിൽ താഴ്‌ന്നത് ഇന്ത്യയ്ക്ക് ആശ്വാസമാണ്. സ്വർണം ഇറക്കുമതി 11 ശതമാനം കുറഞ്ഞ് 258 കോടി ഡോളറിലെത്തി. ക്രൂഡോയിൽ 8.05 ശതമാനം,​ ഇലക്ട്രോണിക്‌സ് 6.48 ശതമാനം,​ അമൂല്യ രത്‌നങ്ങൾ 17.5 ശതമാനം എന്നിങ്ങനെയും ഇറക്കുമതി ഇടിവ് കുറിച്ചു.

മോദിയുടെ മോഹം പൂവണിയുമോ?​

നടപ്പു സാമ്പത്തിക വർഷം 35,​000 കോടി ഡോളറിന്റെ കയറ്റുമതി വരുമാനമാണ് നരേന്ദ്ര മോദി സർക്കാർ ലക്ഷ്യമിടുന്നത്. ഏപ്രിൽ-ഫെബ്രുവരിയിൽ ഇത് 29,​847 കോടി ഡോളറാണ്. അതായത്,​ ഈമാസം 5,​000 കോടി ഡോളറോളം കയറ്റുമതി വരുമാനം കിട്ടിയാലേ ലക്ഷ്യം കാണാനാകൂ. നിലവിലെ ട്രെൻഡ് അനുസരിച്ച് മാർച്ചിലും കയറ്റുമതി 3,​000 കോടി ഡോളറിനു താഴെ തന്നെയാകാനാണ് സാദ്ധ്യത.