പനാജി: അന്തരിച്ച ഗോവ മുഖ്യമന്ത്രി മനോഹർ പരീക്കറുടെ പിൻഗാമിയായി പ്രമോദ്​ സാവന്തിനെ ബി.ജെ.പി തിരഞ്ഞെടുത്തു. പരീക്കർ മന്ത്രിസഭയിലെ സ്പീക്കറായിരുന്നു പ്രമോദ് സാവന്ത്. സത്യപ്രതിജ്ഞ ഇന്ന് രാത്രിയുണ്ടാകുമെന്നാണ് റിപ്പോർട്ട്. രണ്ട് ഘടകകക്ഷികൾക്ക് ഉപമുഖ്യമന്ത്രി സ്ഥാനം നൽകാനും ധാരണയായതാണ് സൂചന.

ഏറ്റവും വലിയ ഒറ്റകക്ഷിയായ കോൺഗ്രസ്​ സർക്കാർ രൂപീകരിക്കാനുള്ള അവകാശവാദങ്ങൾ ഉന്നയിച്ച് ഗവർണറെ സന്ദർശിച്ചതോടെ​ ഇന്ന് തന്നെ സത്യപ്രതിഞ്ജയുണ്ടാകുമെന്ന് നേരത്തെ വാർത്തകളുണ്ടായിരുന്നു. പരീകറുടെ മരണ വാർത്ത അറിഞ്ഞ ഉടൻ ഗോവയിലെത്തിയ കേന്ദ്രമന്ത്രി നിതിൻ ഗഡ്​കരി രാത്രി മുഴുവൻ സഖ്യകക്ഷികളുമായി ചർച്ചകൾ നടത്തിയിരുന്നു. വിശ്വജിത്​ റാണെയെയും പ്രമോദ്​ സാവന്തിനെയുമാണ്​ ബി.ജെ.പി എം.എൽ.എമാർ നിർദേശിച്ചത്​.

പരീക്കറിന്റെ മരണത്തോടെ ഗോവയിൽ ബി.ജെ.പി സഖ്യം ഇല്ലാതായെന്നും കേവല ഭൂരിപക്ഷമുള്ള ഒറ്റകക്ഷി കോൺഗ്രസ്​ മാത്രമായതിനാൽ സർക്കാർ രൂപീകരിക്കാൻ ക്ഷണിക്കണ​മെന്നും ആവശ്യപ്പെട്ട്​ ഗവർണറെ​ കോ​ൺഗ്രസ്​ സന്ദർശിച്ചു. ബി.ജെ.പി സഖ്യ സർക്കാറിലെ ഫ്രാൻസിസ്​ ഡിസൂസയുടെ മരണവും രണ്ട്​ കോൺഗ്രസ്​ എം.എൽ.എമാരുടെ രാജിയും മൂലം 40 അംഗങ്ങളായിരുന്ന ഗോവ നിയമ സഭ 37ലേക്ക്​ ചുരുങ്ങിയിരുന്നു. അതിൽ 14 എം.എൽ.എമാർ കോൺഗ്രസിനും 13 പേർ ബി.ജെ.പിക്കും ഒപ്പമാണുള്ളത്​.

കേവല ഭൂരിപക്ഷമില്ലാതിരുന്നിട്ടും ചെറുകക്ഷികളെ കൂട്ടുപിടിച്ചാണ്​ ബി.ജെ.പി സർക്കാർ രൂപീകരിച്ചിരുന്നത്​. മനോഹർ പരീകർ എന്ന ജനകീയ നേതാവ്​ മുഖ്യമന്ത്രിയാവുമെങ്കിൽ പിന്തുണക്കാ​മെന്നായിരുന്നു പാർട്ടികളുടെ വാഗ്​ദാനം. അതുപ്രകാരം കേന്ദ്ര പ്രതിരോധ മന്ത്രിയായിരുന്ന പരീകറെ രാജിവെപ്പിച്ച്​ മുഖ്യമന്ത്രി സ്​ഥാനം നൽകിയായിരുന്നു ബി.ജെ.പി ഗോവയിൽ സർക്കാർ രൂപീകരിച്ചത്​. അതിനിടെ കർണ്ണാടകയിലെ കലബുറഗീയിൽ പൊതുയോഗത്തിൽ രാഹുൽ ഗാന്ധിയും പാർട്ടി നേതാക്കളും രണ്ടു മിനിറ്റ് നിശ്ശബ്ദത പാലിച്ച് പരീക്കർക്ക് ആദരാഞ്ജലി അർപ്പിച്ചു.