തിരുവനന്തപുരം: പത്തനംതിട്ട മണ്ഡലത്തിൽ ബി.ജെ.പി നേതാവ് കെ സുരേന്ദ്രൻ മത്സരിക്കണമെന്ന രാഹുൽ ഈശ്വറിന്റെ ഫേസ്ബുക്ക് പോസ്റ്റിനെതിരെ രൂക്ഷ വിമർശനം. ബി.ജെ.പി നേതൃത്വം ഇതുവരെ സ്ഥാനാർത്ഥി പട്ടിക പ്രഖ്യാപിച്ചിട്ടില്ല. ഇതേസമയം 'ഹിന്ദു എെക്യം' ഉയർത്തുന്ന തരത്തിലുള്ള രാഹുലിന്റെ പോസ്റ്റ് അദ്ദേഹത്തിന് തന്നെ വിനയായിരിക്കുകയാണ്.

ശബരിമല പോരാട്ടത്തിൽ സജീവമായ പങ്കെടുത്ത രാഷ്ട്രീയ പോരാളിയാണ് സുരേന്ദ്രനെന്നും സംഘപ്രസ്ഥാനവും ബി.ജെ.പിയും ഈ പോരാട്ടത്തിന് വേണ്ടി ഇറങ്ങിയെന്നും രാഹുൽ കുറിച്ചു. എന്നാൽ സുരേന്ദ്രന്റെ ജാതി ഉയർത്തിക്കാട്ടി നായർ സ്വാധീനമുള്ള പത്തനംതിട്ടയിൽ മത്സരിക്കുന്നത് ഹിന്ദു എെക്യത്തിന്റെ ലക്ഷണമാണെന്നും രാഹുൽ ഫേസ്ബുക്കിൽ കുറിച്ചു.

ഇതിനെതിരെയാണ് സോഷ്യൽ മീഡിയിയൽ രാഹുലിനെതിരെ വിമർശനം ഉയർന്നത്. 'ഞങ്ങളൊക്കെ പിറന്നത് ആശുപത്രിയിലും വീട്ടിലും ഒക്കെയാ,​ സുരേന്ദ്രൻ ജി എങ്ങിനെയാ സമുദായത്തിൽ പിറന്നത്?', 'രാഷ്ട്രീയ സ്വയം സേവക് ഇന്നുവരെ ജാതി തിരിച്ചു ഹെെന്ദവ ധർമ്മത്തെ കാണ്ടിട്ടില്ല,​ കെ. സുരേന്ദ്രൻ പത്തനംതിട്ടയിൽ നിൽക്കണം എന്നാണ് മറ്റു മതസ്ഥരും ചിന്തിക്കുന്നത്'. തുടങ്ങിയ നിരവധി കമന്റുകളാണ് രാഹുലിന്റെ പോസ്റ്റിന് താഴെ വരുന്നത്.

ഫേസ്പ്ബുക്ക് പോസ്റ്റിന്റെ പൂർണരൂപം

ശബരിമല പോരാട്ടങ്ങളിൽ ഏറ്റവും സജീവമായി പങ്കെടുത്ത രാഷ്ട്രീയ നേതാക്കളിലൊരാളാണ് ശ്രീ കെ സുരേന്ദ്രൻ

പ്രയാർ സാറും ശ്രീ അജയ് തറയിലും അടക്കം കോൺഗ്രസിലെ ചില നേതാക്കൾ ശക്തമായി ശബരിമലയെ പിന്തുണച്ചിരുന്നു..

ആദ്യമുണ്ടായിരുന്നതിൽ വിഭിന്നമായി , സംഘ പ്രസ്ഥാനങ്ങളും ബിജെപിയും full swing ആയി പോരാട്ടത്തിന് ഇറങ്ങി. അതിൽ ശ്രീ കെ സുരേന്ദ്രൻ ഊർജ്ജസ്വലമായ ഒരു പങ്കുവഹിച്ചു.

നമ്മുടെ ഈഴവ/തീയ്യ സഹോദര സമുദായത്തിൽ പിറന്ന ഇദ്ദേഹം നായർ സ്വാധീനമുള്ള പത്തനംതിട്ട മണ്ഡലത്തിൽ നായർ സഹോദരങ്ങളുടെ പിന്തുണയോടെ മത്സരിക്കുന്നത് ഒരു ഹിന്ദു ഐക്യത്തിന് ലക്ഷണവുമാണ് . ചില കാഴ്ചപ്പാടുകളിൽ വ്യത്യാസമുണ്ടെങ്കിലും ശ്രീ സുരേന്ദ്രനെ പോലുള്ള ഒരു നല്ല നേതാവിനെ പത്തനംതിട്ടയ്ക്ക് ആവശ്യമാണ്.