ലണ്ടൻ: പഞ്ചാബ് നാഷണൽ ബാങ്കിനെ 13,500 കോടി രൂപ കബളിപ്പിച്ച കേസിൽ വജ്രവ്യാപാരി നീരവ് മോദിയെ (48) സ്‌കോട്ട്ലൻഡ് യാർഡ് പൊലീസ് അറസ്റ്റ് ചെയ്‌തു. വെസ്റ്റ്മിൻസ്റ്റർ മജിസ്‌ട്രേട്ട് കോടതി ജാമ്യം നിഷേധിച്ചതിനെ തുടർന്ന്.
കേസ് വീണ്ടും പരിഗണിക്കുന്ന മാർച്ച് 29 വരെ ഇയാളെ ജയിലിൽ അടച്ചു.
മദ്ധ്യ ലണ്ടനിലെ ഹോൾബോണിൽ ചൊവ്വാഴ്ച വൈകിട്ട് അറസ്റ്റിലായ നീരവ് മോദിയെ ഇന്നലെ രാവിലെയാണ് കോടതിയിൽ ഹാജരാക്കിയത്. ഇയാളെ വിട്ടുതരണമെന്ന് ഇന്ത്യ ബ്രിട്ടീഷ് ഗവൺമെന്റിനോട് ആവശ്യപ്പെട്ടിരിക്കെയാണ് അറസ്റ്റ്.
ഇന്റർപോളിന്റെ പിടികിട്ടാപ്പുള്ളികളുടെ ലിസ്റ്റിലുള്ള നീരവ് മോദിക്കെതിരെ വഞ്ചന, പണം തട്ടിപ്പ്, കള്ളപ്പണം വെളുപ്പിക്കൽ തുടങ്ങിയ കുറ്റങ്ങളാണ് ചുമത്തിയിട്ടുള്ളത്.
നീരവ് മോദിയെ ഇന്ത്യയ്‌ക്ക് കൈമാറാനുള്ള നിയമനടപടികളുടെ തുടക്കമാണ് അറസ്റ്റ്. ഇയാളെ കൈമാറണമെന്ന അപേക്ഷ ഇന്ത്യ കഴിഞ്ഞ വർഷം ആഗസ്റ്റിലാണ് ബ്രിട്ടന് നൽകിയത്. അപേക്ഷ ബ്രിട്ടീഷ് ആഭ്യന്തര സെക്രട്ടറി സാജിദ് ജാവേദ് അംഗീകരിച്ച് ഈ മാസം ആദ്യം വെസ്റ്റ് മിൻസ്റ്റർ കോടതിക്ക് വിട്ടിരുന്നു. കോടതി കഴിഞ്ഞ ആഴ്‌ച വാറണ്ട് പുറപ്പെടുവിച്ചെങ്കിലും തിങ്കളാഴ്‌ചയാണ് ഇന്ത്യയെ ഇക്കാര്യം അറിയിച്ചത്. പ്രതിയെ ഇന്ത്യയ്‌ക്ക് കൈമാറാൻ തക്ക കുറ്റകൃത്യം ഉണ്ടെന്ന് കോടതിക്ക് ബോദ്ധ്യപ്പെട്ടതിന്റെ തെളിവാണ് അറസ്റ്റ് വാറണ്ട്. കഴിഞ്ഞ വർഷം ജൂണിൽ നീരവ് മോദിയും അമ്മാവൻ മെഹുൾ ചോക്‌സിയും ഉൾപ്പെടെ മൂന്നു പേർക്കെതിരെ ഇന്റർപോൾ റെഡ് നോട്ടീസ് പുറപ്പെടുവിച്ചിരുന്നു.
അടുത്തിടെ ബ്രിട്ടീഷ് പത്രമായ ഡെയ്‌ലി ടെലഗ്രാഫിന്റെ റിപ്പോർട്ടറും കാമറാമാനും നീരവ് മോദിയെ ലണ്ടനിലെ തെരുവിൽ കണ്ടെത്തിയിരുന്നു. ചോദ്യങ്ങൾക്കെല്ലാം നോ കമന്റ്‌സ് എന്ന് മാത്രം പ്രതികരിച്ച് സ്ഥലം വിട്ട ഇയാളുടെ വിവരങ്ങൾ പത്രം കണ്ടുപിടിച്ച് റിപ്പോർട്ട് ചെയ്‌തിരുന്നു. ഒട്ടകപ്പക്ഷിയുടെ തുകൽ കൊണ്ട് നിർമ്മിച്ച പത്ത് ലക്ഷം രൂപ വിലയുള്ള കോട്ടാണ് നീരവ് മോദി അപ്പോൾ ധരിച്ചിരുന്നത്. മാസം പത്ത് ലക്ഷത്തിലധികം രൂപ വാടകയുള്ള അപ്പാർട്ട്മെന്റിലാണ് താമസമെന്നും ബ്രിട്ടനിൽ ജോലിചെയ്യാനുള്ള ദേശീയ ഇൻഷ്വറൻസ് നമ്പർ ഇയാൾക്കുണ്ടെന്നും ലണ്ടനിൽ പുതിയ വജ്ര വ്യാപാരം തുടങ്ങിയെന്നും പത്രം കണ്ടെത്തിയിരുന്നു.
കീഴടങ്ങൽ പ്ലാൻ പൊളിഞ്ഞു
ലണ്ടനിലെ മെട്രോ ബാങ്കിന്റെ ശാഖയിൽ നിന്നാണ് നീരവ് മോദിയെ അറസ്റ്റ് ചെയ്‌തത്. പുതിയ അക്കൗണ്ട് തുറക്കാൻ എത്തിയതായിരുന്നു.അടുത്തിടെ മാദ്ധ്യമങ്ങളിൽ വന്ന റിപ്പോർട്ടുകളിൽ നിന്ന് നീരവിനെ തിരിച്ചറിഞ്ഞ ബാങ്ക് ക്ലാർക്ക് പൊലീസിനെ അറിയിക്കുകയായിരുന്നു. കേസിന്റെ പബ്ലിസിറ്റി കൂടുന്ന പസ്ചാത്തലത്തിൽ ലണ്ടനിലെ ഒരു പൊലീസ് സ്റ്റേഷനിൽ മുൻകൂട്ടി അറിയിച്ച് കീഴടങ്ങാനുള്ള പദ്ധതിയാണ് ഇതോടെ പൊളിഞ്ഞതെന്ന് മാദ്ധ്യമങ്ങൾ റിപ്പോർട്ട് ചെയ്‌തു. സ്‌കോട്ലൻഡ് യാർഡ് പൊലീസിന്റെ കുറ്റവാളികളുടെ കൈമാറ്റച്ചുമതലയുള്ള വിഭാഗവും നീരവ് മോദിയുടെ അഭിഭാഷകരും തമ്മിൽ കീഴടങ്ങൽ ധാരണയിൽ എത്തിയിരുന്നുവത്രേ.
മല്യയുടെ വഴിയേ
ഇന്ത്യയിലെ ബാങ്കുകളെ 9,000 കോടി രൂപ കബളിപ്പിച്ച് മുങ്ങിയ മദ്യ വ്യവസായി വിജയ് മല്യയുടെ കേസിന്റെ വഴിയേ ആണ് നീരവ്മോദി കേസും. ലണ്ടനിൽ അറസ്റ്റിലായ മല്യയെ ഇന്ത്യയ്‌ക്ക് കൈമാറാൻ ബ്രിട്ടീഷ് ആഭ്യന്തര സെക്രട്ടറി സാജിദ് ജാവേദും മജിസ്‌ട്രേട്ട് കോടതിയും ഉത്തരവിട്ടെങ്കിലും അതിനെതിരായ മല്യയുടെ അപ്പീൽ കോടതിയുടെ പരിഗണനയിലാണ്. 2017ഏപ്രിൽ 18ന് അറസ്റ്റിലായ മല്യയ്‌ക്ക് അന്ന് തന്നെ കോടതി ജാമ്യം അനുവദിച്ചിരുന്നു.
ഒരു വർഷത്തിനുള്ളിൽ ബ്രിട്ടൻ ഇന്ത്യയ്‌ക്ക് കൈമാറാൻ ഉത്തരവിട്ടത് രണ്ടു പേരെയാണ്. വിജയ് മല്യയെയും ക്രിക്കറ്റ് വാതുവയ്‌പ് കേസിൽ പ്രതിയായ സഞ്ജീവ് ചൗളയെയും. ചൗളയുടെ വിചാരണ പൂർത്തിയായിട്ടുണ്ട്.